Confessions of St. Augustine-Immitation of Christ. 

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer

E UIGA I LE FAAMAONIA O LE ALOFA MONI

“Lo’u Atalii e- e te le’i malosi ea ma tutumau i lou alofa?  A faapefea ea ona ‘ou faia, Lo’u Alii e? E mafua ona e te to’ilalo lava i se tete’e itiiti ma e pa’ū ese ai mai au ta’utinoga-ma ua pupū lou loto e saili se faamafanafanaga.

O le tagata e tele lona alofa e tutumau pe a faaosoosoina-ma e le talitonu i faatosina leaga a le fili. A solosolo manuia-ou te faafiafia ia te ia-ae a puapuagatia-ou te le faatiga ia te ia! O le tagata alofa moni -e le taua ia te ia le meaalofa a le tagata alofa- ae o le alofa o lē na foa’i mai.

E taua i lana vaai le agaga na fai ai -ae lē o le tau, ma e faatauvaa ia te ia meaalofa uma i lo lē Pele ia te ia. O le tagata alofa na te foa’i atu -e le taua ia te ia le meaalofa-ae na te faasili A’u i lo meaalofa uma lava!