E ono o’o le mata’upu i le Tulafono

20 December 2015, 12:00AM

Ripotia e Tusitala o le Samoa Observer

Fa’aliliu e Maiava

 O lo’o fefulisa’i pea fa’aLa’au-mamafa e le pulega ma le Kamupani Telefoni o le Digicel Samoa, le ono-molia i le tulafono o le isi kamupani o lo’o la-finau pea i lea ‘au’aunaga – le Bluesky, ona o se fe’ese’esea’iga na tula’i mai i le Apia Park i le taimi o le ta’aloga faitaulia a le Manu Samoa ma le ‘Olopeleki ia Iulai. 

Na fa’ailoa mai i le Sunday Samoan e Rory Condon, le Ofisa Sili o le Digicel e fa’apea, e ui ua latou taliā le fa’ai’uga a le Pule Fa’atonu, lea ua fa’atonuina ai le Bluesky ma le Iuni Lakapi a Samoa, ina ia faia fa’alaua’itele sa latou fa’ato’esega ona o le mea na tupu, ae o lo’o fa’asolo pea mafaufauga o le pulega a le Digicel, po’o le a le isi mea e tatau ona fai.  

“A’o lauliliuina pea e le Pule Fa’atonu pe talafeagai ona fa’ao’o atu le mata’upu lea i leoleo po’o le Ofisa o le Loia Sili mo ni moliaga fa’aopoopo, ae o lo’o iloilo-toto’a fo’i e le Digicel ana fuafuaga pe tatau ona fa’aulu o se tagi fa’asaga i le Bluesky, ona o le leaga o le latou mea ua fai,” o le fa’aaliga lea a Rory na tu’uina mai i le Sunday Samoan. 

Sa su’esu’eina e le Pule Fa’atonu, se fa’aseā na tu’uina atu e le Digicel, ona o le aiāina o a latou masini fa’asalalau i le Apia Park, ma fa’atonuina ai le Bluesky e fa’ato’ese ona o  le mea na latou fai.

Sa talosagaina e lau Nusipepa nei se fa’amatalaga mai le Bluesky – na ‘auala atu ia Leanne Moananu o le Vaega Tau Maketi, peita’i e o’o mai anapo, e le’i maua mai se tali.

Ae na ta’ua e Rory, e matua mata’utia lava mea a le vaega lea na fai.

“O se fa’amoemoe ua fa’amauina i tala-fa’asolopito o Samoa ma ona tagata, le ta’aloga lea a le Manu Samoa ma le ‘Olopeleki,” o lana fa’aaliga lea. 

 “O le mea aupito sili ona leaga, o le faia lava lea ma le iloa e le Bluesky, e matua afaina ai ma fa’aletonu feso’ota’iga uma a le Digicel, na momotu atoa ai feso’ota’iga a le fia afe o le mamalu o le atunu’u ae maise tagata mai fafo na ‘auai mai mo lea fa’amoemoe.

“A’o le’i fa’ataunu’uina lea ta’aloga, sa matua tele seleni a le Digicel na fa’aalu e fa’aleleia ai ana masini ma mea uma mo feso’ota’iga, ina ia mautinoa, ia lelei feso’ota’iga a le mamalu o le atunu’u i le Apia Park, fa’apea fo’i le ‘au-tapua’i ma le vaega lagolago fa’ava-o-malo i so’o se tulimanu o le lalolagi.

“Ina ua mea se su’esu’ega tele sa fa’atinoina, na fa’amaonia ai e le Pule Fa’atonu, le fa’aleagaina ma le mautinoa e le Bluesky o mea-faigaluega a le Digicel, lea na mafua ai ona motusia o le ‘au’aunaga mo pa’aga uma a le Digicel i Samoa nei, o tagata asiasi mai fa’apea malo fa’aaloalogia mai fafo sa ‘auai mai mo le ta’aloga.  

 “E le gata na matua fa’atiga-ulu i le to’atele, a ua le maua ai fo’i se avanoa mo ni faiga-fa’atauva ua iloa ai lava le le-manatu mamafa i le saogalemu o le atunu’u lautele ae maise le le-tausisia o le Tulafono.

“A ua talia ma le agaga fiafia tele e le Digicel, le fa’atonuga a le Pule Fa’atonu na tu’uina mai i le aso, ma e talosia, o nei vaega uma na maua, o le a toe fa’amautuina ai tulaga tau-feso’ota’iga a Samoa mo le aga’i i luma ma tumau ai pea ona agava’a Samoa e talimalo i ta’aloga ma fa’amoemoe tetele fa’apea, e le gata i ta’aloga, o fonotaga ma isi fa’amoemoe uma, e aunoa ma se uiga-palapala fa’apea, e le iloa ai se faiga fa’atauva fa’aTamali’i. “

Ae mo le taimi nei pei ona fa’aalia e le Ofisa Sili o le Digicel, o le a taula’i pea le va’ai “e fa’aauau la latou tautua” o le saunia lea o se ‘au’aunaga aupito lelei mo le mamalu o le atunu’u, ia mautinoa ai le maua pea o feso’ota’iga ma aiga ma uo I le vaitaimi o aso-fiafia. 

“E fai ai fo’i lenei avanoa, matou te momoli atu ai le fa’afetai tele i pa’aga uma a le Digicel ona o le ‘auai pea e avea ma sui o le Aiga Digicel, ma fa’afetai ai fo’i ona o le fa’atuatuaga ma le lagolago-sua i lenei tausaga atoa. Matou te fa’amanuia atu ai ia Samoa atoa, ‘Ia maua se Kerisimasi Fiafia ma le 2016 Manuia.” 

 

(Silasila i le Tusi a le Pule Fa’atonu, o Unutoa Auelua-Fonoti i le Lomiga Fa’aperetania)

20 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>