Sologa lelei mea uma
E leai se itu o fa’aletonu i le taimi lenei i le alo atu ai o Mavis Ofisa o Malie i le fa’aiuga o lenei tausaga.
I le fa’atalatalanoaga ma le Fofoga o Samoa na ia fa’ailoa ai le saogalemu o tulaga uma e le gata i totonu o le afio’aga ia ae o aiga e pei ona i ai le taimi lenei.
“Ia o uta i’inei ia e leai lava ni vaega o gase, mai lava le amataga o le tausaga e o’o mai le fa’aiuga o lo’o gasolosolo lelei pea mea uma lava i le alofa ma le agalelei o le Atua.
“O le alo atu ai i aso fa’ai’u o lenei tausaga ia o lea lava le agaga fa’afetai o lo’o ua i ai le taimi lenei ma o se fiafiaga tele lea mo a’u lava ia. “O lenei tausaga i le toe to manatu atu ai ia e leai lava se isi agaga, o a fo’i ni fa’aletonu na tutupu mai ia ou te iloa lava e a’u ia o le ala lea o le tausaga ma le pepe o le Kirismasi.
“Ia fa’amagalo le tuana’i ae o tatou alo atu se isi tausaga fou, e fou uma ai mea uma.
Na ia fa’ailoa o le tausiga o le aiga o lo’o i se tulaga lelei fo’i.
“Ia o lo’o manuia si o matou aiga , o lo’o i ai lava nai tupe e fa’asoasoa mo le tele o le mau vaega o lo’o ua i ai nei.
“Lea fo’i ua mapu mai le fanau i a’oa’oga, ia lea ua tele ai fo’i se tupe e sefe mai ai mo i matou ma o lea le agaga o lo’o mana’omia i lenei taimi.
“O le a tupe ma so’o se vaega ua foa’i e le Atua i o tatou lima, ia tatou ola ai ma fiafia ai i so’o se taimi.
“O Samoa ia, ia e tau le tagisa fua, a ua leai lava se ina’i ia fai le fa’alifu ulu, pepese fiafia la’ia o le lotu o le afiafi.
“O lea le agaga maualuga o lo’o ua tatou i ai lenei vaitau.
“O le happy lava!
E ui la ina taugata le tau o le soifuaga ae o le agaga muamua o le tinā o lo’o soifua le Atua.
“Ia tatou fai tatalo, aua ua tele na pei e fa’afefefe mai le soifuaga o lo’o ua tatou i ai nei ae o le itu pito sili ona taua o le fa’alagolago lava i le Ali’i e manuia ai so’o se taumafaiga.