Naunau pea le Minisita e tula’i i luma o le Fa’amasinoga

By Pai Mulitalo Ale 21 June 2016, 12:00AM

Ua toe tolopo i le Aso 28 o Iuni 2016, e le Fa’amasinoga Fa’aItumalo i Amerika Samoa le mata’upu o lo’o talosagaina ai le fa’aleaogina o le tusi-saisai na tu’uina atu mo le Minisita o Fa’amasinoga ma le Fa’afoeina o Mata’upu Tau-Fa’amasinoga, o Fa’aolesa Katopau Ainu’u.

O le talosaga a le loia a Fa’aolesa, o Marcellus Tala Uiagalelei, sa fa’amanino atu ai, o le ua molia sa galue lava i le mata’upu lenei ma tu’uina ai le ‘au’aunaga fa’aLoia i se tasi loia, o Marie Ala’ilima na te tauavea. 

Na ta’ua fo’i, i fa’amaumauga a Ala’ilima, o lo’o ia fa’amaonia ai le iai lea fa’amaumauga tau-fa’amasinoga o Fa’aolesa ma sa ‘auai fo’i le fa’amasinoga mo le na talosaga fa’atasi ma le lima-afe tala ($5,000.00) na totogi ia Fa’aolesa mo le galuega sa faia fa’apea ma le isi afe-tala ($1,000.00) mulimuli sa tu’uina atu I le Loia o Ala’ilima sa fa’aauauina le mata’upu.  

O le isi mafuaga na ta’ua e Uiagalelei i lana talosaga, o le leai lea o se malamalama’aga o le ua molia o ia su’esu’ega ma mea ua tu’ua’ia ai o ia.

E le’i maua lava e le ua molia, se fa’aaliga a’o se fa’asea mai ia Fa’aua’a, le sa talosaga i le mata’upu lenei a’o soifua, ma e le’i o’o atu fo’i se tusi-saisai po’o se isi lava fa’aaliga mai le fa’amasinoga ia te ia. 

Pau le mea na iloa ai e le o lo’o tu’ua’ia (Fa’aolesa), o lo’o iai le tusi-saisai fa’asaga ia te ia, o le taimi na fesiligia ai o ia e vaega fa’asalalau i Samoa.

Na fa’amalamalama fo’i e le Loia a Fa’aolesa, o le tausaga e 2015 na maliu ai le sa talosaga ma o le a le-mafai ai ona fa’aauau lea mata’upu i le fa’amasinoga.   

Talu ai ua fai si umi o ta’atia lea mata’upu, atonu o le a faigata ai i itu uma e lua ona fa’aauau le mata’upu i le fa’amasinoga. 

Na ta’ua fo’i e le loia mo le o molia, e le o naunau le faletua o le na tagi e fa’aauau lea mata’upu ma ua ia ioeina ai le fa’aleaogaina loa o le mata’upu ma ‘ave’ese mai le fa’amasinoga. 

I tala mai le vaega o tala-fou i Amerika Samoa, o lo’o ta’ua ai le vala’auina o lea mata’upu i luma o le Fa’amasino o Elvis Patea i le Aso 14 o Iuni 2016 i le Fa’amasinoga Fa’aItumalo.

Na ia ta’ua fo’i, o lo’o aoga pea lea tusi-saisai o le 2008 ma fa’amanatu ai se mata’upu fa’apea muamua, na faia iai le fa’ai’uga a le fa’amasinoga, ina ia fa’ale-aogaina ona o mafuaga lava fa’apea. Peita’i na ta’ua, sa ‘auai le na molia i le fa’amasinoga i le mata’upu muamua.  

Na ta’ua fo’i, ua na maua e le’i o’o atu Fa’aolesa i le fa’amasinoga lea ui sa ‘auai lana loia e fai ma ona sui.

Saunoa fo’i le Fa’amasino o Patea, ua fa’ailoa atu fo’i e le malo, e leai se mana’oga e tulituli’aupu lea mata’upu ma atonu o le tali lava lea o le a o’o iai.

Ae na ta’ua lava e le Loia o Uiagalelei, ui e le o naunau le malo e fa’aauau le mata’upu, ae tatau lava ona fa’aleaogina aloa’ia e le fa’amasinoga le tusi-saisai o Fa’aolesa ne’i iai ni ona a’afiaga mulimuli ane mo ia i le lumana’i. 

E mafai lava ona saisaia Fa’aolesa a-taeao po’o le isi 20 tausaga i luma atu pe a le-fa’aogaina aloa’ia le tusi-saisai e le fa’amasinoga. 

Na fa’ailoa fo’i e Uiagalelei i le fa’amasinoga, o le a ia fa’afeso’ota’i lana tama o Fa’aolesa i sona finagalo i lea fuafuaga ma atonu po’o le vaiaso fou po’o luma atu fo’i, o le a tua ai loa i luma o le fa’amasinga a Amerika Samoa. 

O le Aso To’ona’i na fesiligia ai e le Samoa Observer le Minisita mo sona finagalo, peita’i e le’i fia saunoa mai i lea mata’upu. 

Pau lana saunoga, ua malamalama o le Aso Luan a vala’au ai i le fa’amasinoga ae na fa’ailoa atu e lana loia, e leai se mana’oga tatau e ono o’o atu ai fua.

“Fautua mai lava la’u loia, e pule a’u, so’o se taimi lava ‘ou te mana’o e o’o atu ai e tula’i i le fa’amasinoga,” o le fa’aaliga lea a Fa’aolesa.

Sa feutaga’i Fa’aolesa ma lana loia i le amata o le vaiaso talu ai i le mata’upu lea ma ua tolopo nei i le Aso 28 o Iuni mo le tu’uina atu o se tali a le Loia Sili.

By Pai Mulitalo Ale 21 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>