Saili vaifofo “Leo o Viiga Charitable Trust” i le “Sau ta Savalivali”

21 June 2016, 12:00AM

O le Leo o Viiga o se fa’alapotopotoga tū ma’oti na amataina e le Sususga a le ali’i faife’au o Falefatu Enari i le tausaga 1993, o lona tausaga muamua foi lea i le aoga fa’afaife’au i Malua ina ua fo’i mai Amerika, le mea sa aumau ai, se’ia ō’o i le tausaga e 2001 ina ua vala’auina e le Ekalesia Faapotopotoga Kerisiano Samoa i le Afioaga o Solosolo.

Talitonu Enari o lo’o manatua pea e le to’atele o le mamalu o le atunu’u polokalame a le Leo o Viiga i Aso Sā ta’itasi i luga o le leitio FM ma le 2AP mo le valu tausaga na i ai le fa’alapotopotoga.

O lenei fa’alapotopotoga sā avea ma Leo po o le sui fo ‘i o le puipuia o le pule i le ola i totonu o le atunu’u. Ma o le tulaga lea o le Leo o Viiga na talosagaina ai e le World Health Organisation le Leo o Viiga e latou te faia se sailiiliga o le pule i le ola (suicide research) i Samoa mai le tausaga 1900 -1999 tausaga mulimuli e sefulu o le mileniuma talu ai (last 10 years of the last millennium). 

I le valu tausaga a o i ai le fa’alapotopotoga sa latou fa’asavali polokalame i a’oga maualuluga uma (high schools) a le Malō ma Ekalesia e tolu sefulu ma ona tupu i totonu o le atunu’u, ā ē le’i vala’auina i le galuega tausi nu’u. O lona tofi faife’au na faigofie ai fo’i na fa’atinoina polokalame fa’asavali i nu’u ma Ekalesia. O le tele o nei polokalame na faatupeina e le malō o Ausetalia ma le Ekalesia Faapotopotoga Kerisiano Samoa.  

I le taimi nei lea ‘ua galue fiafia Enari e toe auauna le faalapotopotoga tū ma’oti “Leo o Viiga Charitable Trust” e tu’ufa’atasia le polokalame o maimoa ai nei le atunu’u i le TV o le “Sau ta Savalivali.” Pei ona saunoa Enari, o lenei polokalamena na fanau mai i le tausaga taluai (2015) ina ua tula’i mai ni pule i le ola se tolu i le vaiaso e tasi; a o le vaiaso i luma atu ma tua mai o le vaiaso lea, na tutupu ai fo’i nisi pule i le ola. 

O lea sā talanoa i ana uō ma sona manatu vāivāi ma lona mana’o e amata se polokalame i le TV (TV Talk Show) e talanoaina ai mafua’aga eseese (social issues) e saga tula’i mai ai lenei fa’afitauli matuiā. O le amataga le nā o le polokalame “Sau ta Savalivali” o maimoa ai nei le mamalu o le atunu’u i le TV3 i afiafi o Aso Sā ta’itasi. 

Ina ua fesiligia le Susuga a Enari pe i ai ni mea i tapenaga e manaomia ona silasila toto’a i ai, na saunoa le faife’au, “Pau lava le polega a le Leo o Viiga o le lē maua mai i isi alalafaga o le polokalame ona e lē o āu i ai le TV; leaga e tāua le maua e Tagata uma o le fe’au o molimoli atu e le “Sau ta Savalivali.” E tāua foi i le faife’au tulaga ia ona o lea ua talosaga e nisi o faalapotopotoga e fa’atupeina polokalame fa’apenei (sponsors) le “Sau ta Savalivali” le galulue fa’atasi ma isi fa’alapotopotoga tū ma’oti, pei o le Samoa Victim Support, Returnees, Flo, Goshe e fa’alauiloa ai fo’i a latou auaunaga. 

Ua fa’aalia e le Susuga a le faife’au lona fiafia e fa’aaoga le “Sau ta Savalivali” a le Leo o Viiga Charitable Trust e fa’atino ai auaunaga tāua uma nei, auā le ola malu puipuia o le mamalu o le atunu’u, ma le Soifua maloloina o Tagata uma.

21 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>