Mana’omia le fa’aleleia o moli o auala

By Vatapuia Maiava 21 September 2016, 12:00AM

O le maua ai o le avanoa o le tamā i a Malaesilia Natia o Vaie’e e asia ai nisi o aiga i Samoa nei, na maua ai le avanoa e le Fofoga o Samoa e fa’atalatalanoa ai i nisi o suiga ua taunu’u mai ma ia molimauina i le taimi lenei.

O lana saunoaga, na ia fa’ailoa ai le telē o suiga mananaia ua i ai i totonu o si o latou afio’aga pe ā fa’atusatusa i aso ua mavae.

“O lenei vaitau ua molimauina lava le sologa lelei o le tele o vaega i totonu o le afio’aga nei ma ua leai se aiga o toe fa’aletonu.

 “E leitioa fo’i malo i fafo le fia omai e tafafao mai, ua tele ina fale papalagi uma aiga, e pei o le va’ai i ai i le taimi lenei.

“O lea ua matamata atu , ia o le agaga lena o le toe fo’i mai e fa’amautu aiga ma fanau i a’oa’oga, aua ua leva fo’i ona to’esea. “E ui lava la ina aumau i le tele o tausaga i atunu’u mamao ae le mafai lava ona galo Samoa le olaga matagofie o lo’o ola ma soifua ai le to’atele o nai o tatou tagata.

“E leai lava ma se isi atunu’u e mafai ona fa’atusatusa ai tu ma le aganu’u o lo’o i ai Samoa.

“E ui o  le tau o oloa, o lo’o si’isi’i i luga ia  e pei lava e i ai lava nai vaega e o i luga o i lalo, o lae fo’i e fuafua e le ‘au fai oloa i lo latou malosi, ae leai se isi e faitio aua o le pisinisi lava e tatau ona ola

O lea fa’atalatalanoaga na talosagaina ai e le tamā ni moli auala i le vaega tonu o lo’o nofoia e le to’atele o le aiga.

“E ese le faigata ae o’o i le po ona o le pogisa tele o le auala i le fesopoa’i ai o uta nei ma tai, e masalo lea lava  e saogalemu le aiga nei, ae e pau si vaega sia e fia talosaga ai  i le malo o moli o lo’o i luma o le auala ona o le le faigofie tele o le tulaga o lo’o i ai.

“O lea na omai muamua o lea e fa’aletonu lava vaega nei i moli o le auala, ia lea ua toe fo’i mai o lo’o fa’aletonu lava.

“O le manatu lava ia puipuia le ola o le fanau  ma si o matou nu’u ona e fai lava si pogisa pe a po ma e le  saogalemu lava i la’u va’ai i ai.

“O lea e va’ai atu o lo’o pipi’i matāuila ae le’o ola, o le isi pitonu’u olo’o i ai moli o le auala ae o le sau la i lalo nei e leai ni moli.

O le tamā i a Malaesilia ma le faletua o lo’o i Samoa nei e asia nisi o aiga.

By Vatapuia Maiava 21 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>