Ua 49 ona tausaga ma o lo’o alala ma lona faletua ma ona alo e to’alua i Falelauniu. 

Ina ua afea e le Fofoga o Samoa i le aso ananafi ma fesiligia fo’i i le tulaga o iai le soifuaga i Samoa i lenei vaitau, na ia fa’aalia mai o lo’o sologa lelei pea le olaga i Samoa. 

Ae peita’i, na ia ta’ua o lo’o iai lava nai fa’afitauli o lo’o feagai pea ma lona aiga i lo latou aumau a i Falelauni. 

O le fa’afitauli muamua, o le asu mai le falegaosi fagu malosi a le kamupani mai Saina o lo’o fa’afesaga’i ma le fale o Taiasina ma lona aiga. 

“O le fa’afitauli tele lava lena o lo’o iai i le taimi nei,” na ia fa’ailoa mai i le Fofoga o Samoa. 

“A tou tagataga’i nei i apa o le matou fale, ua lanu uliuli uma i le asu mai le kamupani a le Saina o lo’o tu mai i le isi itu ala. 

“Ua uma foi ona ave la matou talosaga i le P.U.M.A e fesoasoani mai i lea tulaga ae le’i tali mai lava.

“E tele lava se aafiaga o le asu lea sau mai i le kamupani lea auā o lo’o manavaina e tagata o lo’o nonofo ai i lenei itu.

“Ma o se tulaga lea e aafia ai le soifua maloloina o tagata. Aemaise lava i nai fanau iti. O lo’o iai foi si a’u fanau ma o lo’o latou manavaina lea asu.

“Afai foi la o le’a le faia iai se tulaga i lea kamupani, o le’a tumau pea le le manaia o le mea e tupu mai ai. 

“O lona uiga o le’a aafia ai lava le soifua maloloina o tagata aemaise nai fanau iti.”

Na ia ta’ua foi, o lo’o ua a’afia ai fo’i na ana mea toto e pei o fa’i ona o le asu mai le kamupani gaosi fagu malosi a Saina o lo’o le isi itu ala. 

“E le’o tulaga lelei loa mo i matou o lo’o nonofo iinei i lenei nofoaga. 

“Ua a’afia ai foi ma fa’i o lo’o fa’amoemoe iai le tausiaina o si o matou aiga. Ou te popole lava o nai fanau o lo’o laiti.

“Ia e feololo ai le manogi o le sikaleti i le manogi o le asu mai le kamupani, ma e le lelei se moe i le po i le asu lea. 

“A fai foi se fa’apusa a le aiga nei, e ese a le manogi o le asu o le umu, ese le manogi o lo’o sau mai le fale gaosi fagumalosi lea.”

Na ia fa’aalia foi, o se tulaga le manaia foi lea mo turisi e asiasi atu i lea nofoaga. 

“Pei ona fa’aalia atu, o se tulaga le lelei tele mo le soifua maloloina o tagata o lo’o nonofo ma aumau ai i lenei nofoaga.”

E le gata i lea, na ia fa’ailoa mai foi, ua ia leiloa po’o fea se isi itu e faia ina ia fofo ai le fa’afitauli. 

“Ua leva ona ave le talosaga i le PUMA ae o lea lava e lei maua mai se tali po’o fea ua oo iai le talosaga na tuuina atu. 

“Fa’apea ea e mafai ona ou alatu tuli ese le Saina e ona le kamupani.

“E iai foi se tasi o a’u uo o lo’o aumau ai i le isi itu o le kamupani, o lo’o ia feagai ai foi ma lea fa’afitauli.

“O lo’o iai foi lona fa’amoemoe e fia faia se fale e mapu iai turisi, ia ae afai o le tulaga lea, o lona uiga e tasi lava le aso ae toe fia alu ese le turisi ona o le asu.”

E le gata la i le fa’afitauli  o le asu mai le kamupani a le au Saina, na fa’ailoa mai e Taiasina, o le isi fa’afitauli o lo’o feagai ai ma i latou, o le tulaga lea i le le lelei o auala i le latou foi fa’aitu. 

“Ua fiu foi e talosaga i le malo ae e le’i tali mai lava. 

“Ia o le aiga nei, sa iai taavale, ae ua toe fa’afoi taavale i lo matou aiga i Lauli’i ona e vave ae leaga ai ta’avale i le lau leaga o le auala. 

 “O le tulaga lea ua iai, ua leiloa poo ai o le a fai aga’i iai se talosaga. Ua fiu fo’i e fa’atali. O le mea lea ua matou fa’afetaia ai lenei polokalame se’i fa’ailoa atu ai se talosaga vaivai i nisi o fa’afitauli o lo’o feagai ai ma tagata o lo’o nonofo ai i lenei nofoaga. 

“Ia sa matou talosagaina foi le SLC, ae peitai o le talosaga sa faia i taimi o Faumuina Tiatia Liuga. Sa fa’apea foi la ona aumai se fa’amatalaga fa’apea o le a faia le auala, ae peita’i ua uma atu lava le palota ma galoma atu ai ma lea talosaga. 

“Ou te manatu la o le a matou fa’atalitali foi la i le isi faiga palota mo se tali mai o lenei auala.

“O lea ou te fa’afetai atu ai i la otou polokalame, ua aumai ai foi le avanoa e fa’asoa atu ai le mamalu o le atunu’u i ni fa’afitauli o lo’o feagai ai pea ma aiga ta’itasi i totonu o Samoa. 

“Auā a leai polokalame fa’apea e le taitai ona iloa mai e le to’atele mea o lo’o tutupu i soifuaga o tagata i aso fai so’o.”