Ua le toe tutusa lava le olaga i aso nei
“Ua telē lava le suiga o Samoa.” O se tasi lenei o agana ua masani lava i le fa’afofoga a le atunu’u i lenei vaitau.
E ui fo’i la ina le mailoa e nisi le tele ma le anoanoa’i o suiga ua iai i lenei vaitau, peita’i e to’atele lava o lo’o pei o le selo le maitauina o suiga ua iai.
Auā o le upu lava a le atunu’u e mau e fa’alele, mau fo’i e maitau.
O le finagalo foi lea o le tinā ia Mili Togiasu e 41 tausaga mai le afioaga o Vaitele-Uta.
Ina ua fesiligia e le Fofoga o Samoa mo sona finagalo i le tulaga ua iai le soifuaga o Samoa i lenei vaitau, na ia fa’ailoa mai, ua le toe tutusa lava aso nei ma aso ua mavae.
O le tinā ia Mili e fai lana maketi i luma o lona fale e fa’atau ai fuala’auaina ma meataulima a nisi o le mamalu o le atunu’u.
“Ua fai sina leva o iai le maketi lenei i luma o le matou fale.
“E le’o se matou ma’umaga e aumai mea o lo’o fa’atau i luma o le maketi.
“O le tele o mea o lo’o fa’atauina i luma o le maketi e aumai i nisi o le mamalu o le atunu’u o lo’o fia fa’atau foi fua o latou fa’atoa’aga auā ni seleni e tausi ai aiga.
“E kiliva mai lava a latou mea fa’atau iinei ona matou fa’atauina lea. A iai foi isi taimi ua le mafai ai ona kiliva mai, ua alu le matou ta’avale e aumai popo ma isi mea e fa’atau i luma o le maketi.
“E feololo lava fo’i si seleni e maua mai ai, ma e fesoasoani tele lea mo nai aiga o lo’o aumaia a latou mea e fa’atau i luma o le maketi.”
Ae peita’i, na ia fa’ailoa mai fo’i, ua le toe tutusa lava nei aso.
“Ua le pei o la aso sa telē lava se seleni e maua mai pe a maea ona fa’atauina oloa uma.
“Ai ona ua tele le mau pisinisi laiti aemaise o i latou ua fa’atau a latou fuala’au’aina ma isi meataulima i tafatafa o auala, ai o le mafuaaga lea.
“O le ala foi lea ua ou fai atu ai, ua le toe tutusa lava nei aso pe a fa’atusatusa atu i aso ua mavae.
“Ua tele foi ina taugata le soifuaga i lenei vaitau.”
Ae peita’i na fa’ailoa mai e Mili, o le metotia lava o lo’o faia e lona aiga e fa’aitiitia ai le tulaga lea o le taugata o le tau o oloa, o le faia lea o a latou fa’atau i le amataga o le vaiaso auā le vaiaso atoa.
“E taugata pe’a fa’atau ta’itasi. A’e telē lava le sefe pe a fa’atau atoatoa maim ea mai le faleoloa ona fa’asoasoa loa lea mo le vaiaso atoa.”
Na fa’aalia mai foi e le tinā ia Mili, e le’o iai se mativa i Samoa.
Na ia ta’ua, o lo’o tele ma anoanoa’i fa’amanuiaga a le Atua mo Samoa.
“E mafua lava ona mativa le tagata o lona le gaioi. E fesoasoani mai le Atua i le tagata o lo’o tu’itu’i atu pea ia te ia ma aioi atu ae o lo’o fai fo’i lana galuega e atina’e ai lona aiga.
“O a’upega na e lua e maua ai manuia o aiga. O le tatalo ma le galue malosi.
“E leai lava se isi e atoatoa. Ma ua tatou iai foi i le vaitau ua faigata ai le olaga. Na pau lava le mea e fai o le galue ma fa’alagolago i le Ali’i auā o ia e ou le malosi ma le mana uma lava.”