O toe saogalemu ea Samoa pe leai?

22 July 2016, 12:00AM

O le Polokalame o le 60 Minute e fa’atatau i le fa’amalosia o se turisi mai Ausetalia i Samoa i le tausaga talu ai, ua lagalaga ai le mau fesili i le saogalemu pea o Samoa mo turisi ma tagata tafafao mai fafo. O le a sou finagalo, o saogalemu pea Samoa mo tagata-tafafao? Ae aisea? Na fesiligia e Sarafina Sanerivi i le Polokalame o Talanoaga i le Ala i le aso, le mamalu feafioa’i o le atunu’u,  ma o nisi nei o finagalo na fa’aalia:

Sifuiva T. Esau (Vaitele-fou) 

Ioe, lea lava e saogalemu Samoa ma ‘ou te fa’amalosi’au atu fo’i i tagata-tafafao, e o-mai pea i Samoa. O le mean a tupu, o se fagufagu lea mo le tatou malo, o leoleo ma latou o va’aia  pagota i le falepuipui. O le tulaga lea ua tatau ona matua silasila toto’a iai ma ua tatau ona faia iai o se fofo i le taimi nei. A ua tupu nei mea ona o le pagota lea o Lauititi ma lana mea na fai i si ulugali’i Ausetalia, lea ua matua afaina atua ai le atunu’u. Ae sa tatau lava ona le-tupu lea fa’alavelave pe ana malu le puipuiga a tagata i le falepuipui ma tu’u ituaiga pagota fa’apea i le sela, ia le mafai ai ona sosola i tua. O pagota pei o Lauititi sa tatau lava ona loka i se sela mo ni vaiaso se lua, ‘aua le fafaga pe ‘ave iai ni vai. Ua tatau ona a’oa’ia ai ma ‘aua le toe tu’ua iai se avanoa e alu ai i tua ma le falepuipui i so’o se taimi. Matua ‘ou le-fiafia lava iai, i le pua’a lena o Lauititi talu ai, o ia e to’atasi ua tupu ai lenei mau vevesi ma ua fa’aleaga ai le igoa pele o le atunu’u. A o se fa’aletonu fo’i o leoleo ma latou e va’aia pagota i Tafa’igata. Ua tatau i le malo ona fai se isi falepuipui saogalemu ma malu-puipuia lelei, ia matua maualuga am mautu se pa, ma fa’ailoilo ina ia taofiofia ai pagota i totonu, ia ‘aua ai ne’i toe afaina le lautele o le atunu’u ae maise fo’i, e aupito taua le soifua o nai tagata asiasi mai i Samoa. Ae a fua atu lava i isi atunu’u o le Pasefika, ‘ou te manatu o Samoa lava le atunu’u e aupito saogalemu e asiasi iai. 

Sala’a Foleni (Sapapali’i) 

Matua tele mea ua tutupu ma aliali mai i lo tatou atunu’u, ma a fua i mea uma o tutupu i nai masina ua mavae nei, e mafai ona ‘ou fa’apea atu, ua le toe saogalemu Samoa mo tagata tafafao mai fafo. O le matua to’atele lava o tupulaga le-faigaluega o lo’o feoa’i so’o i le taulaga ma fa’atupu vevesi i nofoaga faitele. E leai ni mea aoga o latou fai, ua le-nonofo lelei ma matua i o latou aiga a ua feoa’i solo i le taulaga ma fa’atupu vevesi ai. E o’o fo’i i leoleo, e le o lelei ona fai o la latou galuega, o le tausia o le saogalemu i le atunu’u. A o le mea moni lava lea.  E le-mafai ona tatou fa’afoliga, a-mea o lo’o lelei mea uma. O le fa’alavelave lea na mafua ona o se pagota. Na sola i tua ma tupu ai le fa’alavelave lea ae sa tatau ona matua loka lelei onao le tele o ana mea leaga ua faio. Ua fa’aleaga e le tagata lea le igoa pele o lo tatou atunu’u ma ua ta’u mai ai, e le o lelei ona fa’atino galuega a leoleo o le falepuipui fa’apea fo’i le Matagaluega o Leoleo. ‘Ou te tu’ua’ia lava e a’u le Matagaluega o Leoleo ma tagata o va’aia le falepuipui i Tafa’igata. E le o le taimi muamua lea ua sola ai i tua le pagota lea ma fa’atupu ai le mau fa’alavelave na a’afia ai fua ma isi tagata soifua. Uma le sola’aga fa’alua, ae na toe mafai fo’i ona sola, lea semanu a maliu ai se ali’i-faiPisinisi mai Saina. O le talanoaga lea a le 60 Minute ma le Ali’i Palemia, ua aoga tele aua tatou te mo’omia le faia iai o se fofo ma se fa’atatau. Ua matua alagatatau ona silasila toto’a le malo i le mea lea, i le taimi nei lava. E le gata i lena, ae tatau fo’i ona tatou galulue fa’atasi o se atunu’u e tasi, e fa’atosina mai nisi turisi se to’atele e asiasi mai i Samoa nei. 

Evita Vagana (Vaitele) 

 ‘Ou te iloa ua le toe saogalemu lo tatou atunu’u i le taimi nei. E mafua ona o uso ma tina e tai-vaiaso lava ma fa’amalosia. Lea tatou te va’aia pea i nusipepa ma televise, e fa’alogo fo’i iai i luga o leitio. Sa le masani ai fa’apea. O nisi fo’i o ‘ave-ta’avale laiti, ua tafili-saunoa i nai turisi e asiasi mai, ma e le mafai ona ona toe o’o mai pe afai o le faiga lea e fai iai e nei tagata leai ni mafaufau.  Ua matua tele faletalimalo fou ua iai i Samoa ae o le a le taua o le mananaia o nei faletalimalo fou ae leai ni tagata-maimoa mai fafo? ‘Ou te iloa o le mea tatou te mo’omia, o le galulue fa’atasi e fo’ia fa’afitauli nei e tutupu so’o i lo tatou atunu’u ae taumafai e fa’atosina mai turisi e asiasi mai i Samoa. Ae toe fa’apea atu ai, ‘ou te iloa e le o toe saogalemu Samoa i le taimi nei.  

Karene Esau (Vaitele) 

O lo’o saogalemu lava tatou ia i Samoa nei. O le mata’upu lea na mafua i se tagata e to’atasi. Ua matua afaina uma ai si o tatou atunu’u atoa ae maise le matau mai a fafo, peita’i ‘ou te matua talitonu lava, o lo’o saogalemu pea si o tatou atunu’u. Tatou te le malamalama pe mafua lava i se a ona fai e lea tagata se mea fa’apea, atonu pe ua matua ova le mana’o, ae ta’ilo. A o se mea e ao ona silasila iai le ofisa o leoleo fa’apea vaega o le falepuipui. A manana’o e aga’i mai pea turisi i Samoa nei, e tatau lava ona fa’amautu le saogalemu o tagata uma, Samoa ma tagata asiasi mai, talu ai , o latou nei o a tatou malo-fa’aaloalogia, o lo’o tele lo latou sao mo le tamaoaiga o le atunu’u. Ua tatau fo’i ona iai o se pa fou ma se falepuipui fou e ta-loka lelei pagota i totonu mo le saogalemu o o tatou tagata fa’apea turisi mai fafo. O lena, ae ‘ou te talitonu lava, o Samoa le tasi o atunu’u e aupito saogalemu ma matagofie i le lalolagi, mo tagatasi asiasi mai fafo.  

Emma Scanlan (Faleula) 

Lea lava e saogalemu Samoa i le taimi nei ma avea o se atunu’u aupito matagofie ma ‘aulelei. O le atunu’u aupito lelei lenei mo tagata asiasi mai fafo. ‘Ou te fa’amalosi’au atu fo’i i turisi, ia o-mai e ‘ae’ae le si’osi’omaga matagofie o Samoa ae maise lana aganu’u e tulaga ‘ese. E to’atasi lava le lago-mate lea ua afaina atoa ai le atunu’u ma lona tulaga lelei. Ae le fa’apea e tutusa-pau uma ai tagata o Samoa. O tatou o se atunu’u e fa’avae i Le Atua ma e fiafia ma agalelei o tatou tagata. O le tulaga lea ‘ou te fa’amalosi’au ai tagata asiasi mai fafo, ia asiasi mai pea i lo tatou atunu’u matagofie, aua o lo’o saogalemu pea pei ona masani ai. 

Sio Fala’a (Toamua) 

Lea lava e saogalemu si o tatou atunu’u nei. ‘Ou te le malamalama pe mafua i se a ona fai mai tagata e le o toe saogalemu lo tatou atunu’u. Ioe, e fa’anoanoa lava ona o le mean a tupu i si ulugali’i mai Ausetalia ma e lagona lava le alofa iai. Ae na o le tasi a lena o le mea na tupu. Lea lava e matagofia ma ‘aulelei si o tatou atunu’u, e tatau ai pea i turisi ona asiasi mai i Samoa. 

22 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>