Tapu’e tomai Ta’aloga Soka

57 Hits

(OFISA SO’OUPU) O le miti a soo se tagata taalo o le avea lea ma polofesa o le taaloga aemaise o le avea ma avefu’a a lona atunuu.

E faapea se tofa na a’e i le Faalapotopotoga Soka i Samoa lea ua toe faaolaola ai le nofoaga e tapue ai agavaa ma tomai o alo ma fanau a Samoa i le faatinoga o lea taaloga.

O lea nofoaga o loo i Tuanaimato e pei ona faailoa mai e le Faalapotopotoga i se latou pepa o faamatalaga na tuuina mai i le Ofisa o le Savali.

O le vaiaso na sei mavae atu, na toe molimauina ai le toe amata o le nofoaga autu e faatino ai polokalame atinae.

O lea polokalame mo atinae o se vaega lea o polokalame faapitoa a le faalapotopotoga mo lenei tausaga 2018.

I le toe amatalia ai o lea polokalame e toe tapu’e ai tomai ma agavaa o tama fanau a le atunuu, na amata lea i tamaiti e toa 30 na filifilia mai soo se aoga ma kalapu lea o loo tauva i le Taamilosaga a le National Youth League.

O le auga ma le faamoemoe o lea polokalame o le toe tapue lea o tomai ma agavaa o alo fanau a Samoa mai le 10-13 tausaga le matutua.

Aua e pei lava ona faaalia i lea pepa o faamatalaga e faapea, e iai le talitonuga ia faafaileleina alo ma fanau o le atunuu mai lava i le laititi.

Nisi o alo ma fanau o le atunuu o loo i lalo o le polokalame a le FFS

O iai vaega taua o lea polokalame, o le taula’i lea o le vaai i le faaleleia o tomai faapitoa aemaise o le amio pulea.

O loo maitauina foi i lea polokalame, le tulaga talenia o alo o le atunuu e ala i le malosi faafouina, lea o loo o faatasi ma le amio pulea lelei aemaise o tomai faapitoa mo le faatinoina o le taaloga, ma o le taua foi lea o le vave tapue o tomai ma agavaa o alo ma fanau o le atunuu.

I taumafaiga lava ia a le Faalapotopotoga e tuuina atu ai fesoasoani mo le atia’e o tomai ma agavaa o alo ma fanau o le atunuu mai i le amataga o lea polokalame, ua latou ofoina ai sikolasipi mo tamaiti o le atunuu e pei foi ona iai le sikolasipi i le alii o Jarvis Alatise, lea o loo aoga i Hasting Boys High School i Niu Sila mo le lua tausaga.

O le faagasologa o lea polokalame o loo tatala ai le avanoa mo alii ma tamaitai laiti mai le 10 i le 13 tausaga le matutua.

O loo ofoina atu foi e le Polokalame tulaga tau i femalagaiga i nisi o tamaiti ua filifilia, ina ia mautinoa o loo faaauauina ona auai i lea polokalame tauatinae.

© Samoa Observer 2016

Developed by Samoa Observer in Apia