FETAUIGA A LE LALOLAGI

By Seti Afoa 23 May 2016, 12:00AM

A lea ua manino mai, o le  meauli-Farani lea sa fai nei ma leoleo-faitoto’a mo Peretania. A’o lea la ua fa’atotolo nei e le tama-Samoa, le matai ‘Aufaga, o le isi la la’asaga ua i vaimata nei o tamaiti o le Pasefika, o le osofa’ia loa o Peretania.

O talanoaga ma le mau manatu ina ua mae’a le fusu’aga i le Aso To’ona’i, ua taula’i ai le silasila mo le aga’i i luma o le tama-fusu Samoa. Fai mai e tatau ona malo Parker ia Takama, ona fa’atoa maua lea o sona avanoa i le tama-Peretania, mo le Taua a le Lalolagi.

O le mea muamua lava, e le matua tele na’ua ni tala i le evaga a le ali’i-Farani lea na sau nei.

Na muamua lava fa’amatala e Parker, tulaga fa’amata’u a Carlos Takam. “Na tau lelei ana tu’i ma so’a  pupu’u, ma na fai mai loa Kevin ‘ou te me’ime’i-’ese ma fa’aaoga lo’u ‘umi e fusu-vala ai, sa amata loa ona lelei ma ‘ai-lelei a’u so’a.” 

 “O le fa’amamafa lava lena, ia 100 pasene le fusu’aga lenei, ui sa iai taimi na misia ai. Ae na toe osofa’i loa ma fa’alogo atu ia Kevin o tauvala’au mai “talua le so’a”, na amata loa ona toe lelei.” 

Sa fesiligia fo’i i le malosi o ana tu’i na lavea ai Takama, ae tali: “E foliga e malo lava le ‘auvae o si ali’i. Ua loa fo’i aso o fusu ma isi tama-lelei ma e iloa-gofie lava ua leva ona tapena mo le fusu’aga i le po nei. Na iloa lava na sau motu ia malo.” 

O le ta’amilosaga valu lea, alu loa i le oti ma le ola, leai se mea na tu’ua ma e le’i filemu ai Takam. 

“Ioe, e fai lava le loto i si alii ma e sa’o lava ua leva ona tapena mai mo le fusu’aga. Na ‘ou iloa lava na ‘ou maua i le ta’amilosaga valu ma sa tele ina lavea i a’u so’a ma tu’i, i le ulu ae na galo ia a’u le tino, sa tatau ona matua la’u iai ni  pomu malolosi i le o’o ma le manava.” 

Na fesiligia fo’i ina ua lavea ia Takam, a’o a ni fa’alogona. “Ioe, e manaia lava,” o lana fa’aaliga lea ma ‘ata. “Na tiga fo’i ana tu’i i nisi taimi na ‘ou lavea ai.” 

“O le fa’amoemoe lava o le fusu’aga lenei, ia matua lavea i so’a ma tu’i ma fa’amasani le tino i le lavea ai, peita’i, o se fusu’aga faigata tele ma finau, o nisi fo’i taimi sa ‘ou matua lavea ai lava.” 

Na fiafia le faia’oga o Kevin Barry ona o le gasologa o le fusu’aga, “O se fusu’aga mata’ina tele ma e matua tele sona aoga, tele fo’i a’oa’oga lelei mo Joe.”

“A tilotilo lava i a matou fusu’aga i totonu o le tolu tausaga ua mavae, sa taumafai lava e fa’asolosolo lelei – ia fuafua lelei mo le fusu’aga lenei. O le po la lenei, e le o se la’asaga la’iititi, ona e matua mata’utia le ‘meauli-Farani lea”.

“Sa ‘ou taumafai lava e tapena lelei mea uma ina ia sili atu i le tulaga sa iai i fusu’aga muamua a Joe lea la ua silasila iai, i le tulaga mata’ina ua iai lona taumafai.

“O le a aoga tele ma tele mea lelei ua na maua mai le fusu’aga lenei nai lo isi ana fusu’aga e 18 muamua. Ua ‘ou matua fiafia lava ona ua mafai ona tula’i mai, e fa’afeto’ai le malosi o osofa’iga a Takam. Na toe fa’amalosi lava ma una’i atili ai, e so’a-talua ma fa’aauau ai lava fa’apena ma mamao ai le malo i le tele o ta’amilosaga ma taofia ai le fusu-u’u mai i totou o Takam.”

 “O se tulaga faigata tele ia a’u, ona e pei lava Joe o lo’u atali’i, o lo’o ‘ou mata’i a’o alu i le taua. Na ‘ou iloa lava o le tulaga lea e o’o iai, e le matua fitifiti tele Carlos Takam. O se tagata lelei o le paga-mamafa e tatau lava ona aga’i iai pe a fia ‘ausia luga.

“O le mea aupito manaia ia te a’u, o le fa’alogo atu, e ‘au-‘au-fa’atasi uma fa’amasino ia Joe. Leai se fa’aluafesasi, e o’o lava i le fa’amasino mai Farani… sa matou fa’apea ai a fa’a’au-‘au ia Takam, ae leai, sa fai lava fa’ai’uga, e fa ‘ai e sili ai Joe ia Takam.” 

 “Na fai iai i le fa’ai’uga o le ta’amilosaga iva, ‘o le mea tonu lea e ta’u o fusu’aga a le paga-mamafa’,” o le tala lea a Barry ia Parker. “O le fusu’aga tele lenei ma o lea ua e o’o iai, ma ‘ou te mana’o ia e malo i ta’amilosaga e tolu o lo’o totoe. E te malo i ta’amilosaga uma nei e tolu ma ia amata i le ta’amilosaga 10 ona e malo, lea lava na ‘ou talitonu, sa fa’apena ona malo ai Joe. Na malo i le ta’amilosaga 11 ma le 12 ae na taufao lava le mulimuli.

“Sa ia fa’aila fo’i, o Joseph Parker e le iai tama-fusu aupito maualuluga i le lalolagi, aua e na o le 24 ona tausaga. E tele lava ma ‘umi se ‘auala o le a aga’i atu ai ma e tele lava vaega e tatau ona masani ma fa’aleleia atili. Ioe, lea ua iai le tatou tama-fa’amoemoeina i Niu Sila nei i le taimi nei, lea ua numera tasi i le fusi a le lalolagi, i le vaega o le IBF.” 

By Seti Afoa 23 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>