Olaga tausi aiga o le tina ia Ana

By Aruna Lolani 24 July 2017, 12:00AM

O le olaga faamatua taitoatasi, o se auala lea mo e loto toa ma au malosi.

O se manatu lea na maua mai ile faatalatalanoaga a Ana Puleaiese ilea so ananafi. 

Sa ia faamatalaina mai le faigata o le olaga sa ia ola mai ai ma le tausiga o lana fanau na o ia.

E 63 le matua o lona soifua ae le vaai se foliga vaivai ia te ia, pei ona taua ile Fofoga o Samoa, o ia o se tina e au malosi e galue i lona faatoaga, faatau atu i totonu lava o le nuu ma le faiga o feau i lona aiga. 

“Ua leva ona ma tete’a ma le tama o le aiga ile 1985 ma sa tausi mai a e au ia lau ia fanau,” o lana tala lea i le Fofoga o Samoa. 

“Na tausi mai lava e au ia lau fanau, o le taimi na la e soifua na i ou matua."

“Lea la ua iu lelei aoga a tamaiti, fai aiga ma faigaluega lelei, lea ua matou toe selesele ai a matou ia."

“O le tasi o alo lea sa faauu fa'apatele mai o i Safotu Savaii ma o isi o fanau o loo nonofo i Ausetalia.”

Sa taua e Ana o ia o loo nonofo faatasi ma le tasi o ana alo tama ma o ia foi lea e tele ona fesoasoani ia te ia i totonu o le laua aiga.

O le tasi o ona alo o lo’o malaga atu i Savaii.

Na ave uma le taimi ma le malosi o Ana ile tausiga o le fanau ina ua motusia le laua mafutaga ma lona toalua.

“O au ia sa uma loa lena paga, uma foi loa. Sa ou le toe fia fai paaga lava aua foi ou te alofa i lau fanau."

“O au a ia ou te lei toe manao i sesi, o lou au a ia talitonuga lena ma o lesi foi mea, e tele ai lou ia saolotoga i mea ta te alu iai; pei la o le bingo aua o au ou te fiafia e taalo ile bingo."

“O lea foi ua iai lou tiute tiakono i totonu o le lotu."

“E iai lau fa'atoaga fai ma le koko ma o lo’o tau atia’eina foi le toga fualaau’aina."

“O au ia a lava a le elegi ma le moa e ai ile vaiaso ua lava ma totoe lena aua foi ua taugata lava le tau ole soifuaga."

“E leai a ma se fa'afitauli i totonu o lou aiga, vagana ai taimi ia e sosola ai pagota i tua ma ou te popole a tei omai i tua nei.”

By Aruna Lolani 24 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>