O le taumafai e mauaina se suavai i lenei vaitaimi o se tulaga ua le toe faigofie ma o se faafitauli lea mo le tatou sosaiete.

O le manatu faaalia lena a Samoa Letoa mai Solosolo.

Sa maua atu e le Fofoga o Samoa, Same ma lona afafine o Sala, ua faatoa foi atu ile faiga o le laua faatau mai le taulaga.

“E lelei a mea i totonu o le matou nuu ae tasi a le faalavelave o le sua le ole vai,” o lana tala lea ile Fofoga o Samoa.

“O le oga totonu lea o le nuu lea, e ola mai le suavai ile ta o le lima i le taeao sei paia le ta o le valu ile po.

“Na o le pau a lea o le pito ole nuu e faapea ae e alu la i isi itu o le nuu; e ola lelei uma a latou paipa.

“Ao aiga la lea e i nei e aofia atu ai ma au, e faapenei uma a latou vai e ola mai le ta o le lima ile taeao, e ta loa le valu ile po, ona pe foi laia ma o se mafatiaga lava le taumafai e sefe le suavai i aso uma. 

“Pei la o se talosaga, e manaia ma aoga tatau le iai o se tane vai ina ia mafai ona sefe ai le suavai ae lei oo ile taimi e pe ai le suavai ile po.

“E manaomia a le iai o le suavai i taimi uma aua e iai a matou fanau.”

E to’afa lau fanau laiti o loo iai ma e manaomia lava e latou le suavai i taimi uma, o le fanau foi e le mafai ona e taofia pea fia feinu ma fia aai.

“E manaomia lava se matou tane vai e faamama avega mai foi ia matou. 

“O au ou te faigaluega aua lou aiga ma o lau totogi e maua e lava i le tausiga o lou aiga.”

“E taua lava le iai o le tane vai i tulaga faapenei, e lelei mo le sefeina o le suavai. 

A e fia fesoasoani ia Same Letoa, faamolemole faafesootai mai le Samoa Observer i Vaitele i le numera 23078.