O le Atua e ala mai ai manuia

By Sarafina Sanerivi 24 September 2016, 12:00AM

O Samoa o se atunu’u e fa’avae i le Atua. 

Ma o so’o se mea fo’i e fai, a aunoa ma le fa’amoemoe i le Atua, e lē i’u fo’i  i se manuia. 

O le talitonuga lena o le tama ia Alex Sovala e 26 tausaga mai le afioaga o Tiavī.

O le tamā ia Alex na maua atu e le Fofoga o Samoa o fai ana galuega i lona ma’umaga i Tiavī.

“Ia o le fe’au masani lava lenei i tua nei,” o lana tala lea. 

“O le olaga lava i tua nei ua masani i le ola fai ma’umaga ma le ola galue. E fai ma’umaga o aiga e le gata i talo, ae fa’apea fo’i i fuāla’au-‘aina e pei o kapisi ma isi. A fa’apea fo’i la e fia a’ai le aiga i se mea lelei i ina’i ai le fa’alifu, na’o le tatala lava o le apa eleni, falai i le kapisi ae fai ai le tausiga o le afiafi. 

“E fa’alagolago lava aiga i ma’umaga e ola ai. O le ma’umaga fo’i o le alagātupe lea e maua ai seleni a tagata auā le tautuaina o le lotu ma le galuega a le Atua.”

Na ta’ua e Alex, na te lē lagolagoina le manatu o le to’atele ua fa’apea mai o le tele o mea e fai a le lotu ua mafua ai ona matitiva tagata. 

Ae o lona fingalo, o i e ala mai ai manuia o aiga ma fanau. 

“O le tautua lotu, o se mea lava leva. E le mafai ona tatou ‘alo ese mai ai. O lau tautua i mea e fai a le lotu, e ala mai ai manuia ma fa’amanuiaga a le Atua ia i tatou. 

“O le a la le mea e maua pe afai e tautua ma le tomumu? O le fa’avae lava o si o tatou atunu’u, o Samoa e fa’avae i le Atua. 

“O lona uiga, e fa’amuamua lava le Atua i so’o se mea. ‘Ae le fa’apea na’o le nofonofo ma fa’atalitali po’o afea e maua mai ai manuia o le Atua ae leai se ola tautua.”

E le gata i lea, na fa’ailoa mai fo’i e Alex, o le olaga lava i nu’u i tua e faigofie lava ma to’afilemū.

“E seki lava le olaga i tua nei,” o lana tala lea. 

“E leai lava se vevesi, e filemū lava mea uma. Na’o le pau lava lea o le fe’au tele i tua nei o le ma’umaga ma galuega e fai auā le tausiga o aiga.

“Auā o le upu moni, a le afu le tagata ma galue, e le maua se manuia o aiga ma fanau fo’i. E leai fo’i nisi e fa’alagolago iai matua, ua na’o i matou nei o lo’o lava le malosi e fai ai feau e tele. 

“Ma o le upu fo’i lea e faia e le to’atele faimai o lo’o iai le mativa i Samoa, ou te matuā tete’e ai lava. E a la ona pologa le tagata ia o le galue. 

“O le a le mea e maua pe afai na’o le moe ma nofonofo ae le tu i luga e galue? E leai lava se tigaina o le ala usu i le taeao e tōtō le talo ma fa’i, e mo’i e umi se taimi e fa’atali ai, ae a o’o i le taimi e selesele ai, o le suamalie ia o le taui. 

“A o’o fo’i la ina fua ma ola e selesele ai fanau ma aiga i le lumana’i.”

Ae peita’i , na fa’ailoa mai e Alex, na pau lava le fa’afitauli o lo’o feagai pea ma tagata Samoa, o le taumafai lea e fa’ata’ita’i i le olaga o tagata o lo’o alala ma papa’a’ao i atunu’u mamao.

“O le isi na tulaga ua tele ai le sese o mea o le ola fa’atusatusa fua i tagata o lo’o nonofo i atunu’u mamao. 

“A ola lava le Samoa ia i le olaga ua masani ai, e leai lava se mea o le ‘a fa’aletonu ai.”

Na ia fa’ailoa mai foi, o lo’o lelei lava le tulaga i le suavai maua i Tiāvī.

I lana tala mulimuli lava, na fa’apea mai ai Alex, e leai lava se isi auala e aupito sili ona manaia le maua ai o tupe e tusa ma le fai ma’umaga.

“Ua tolu nei tausaga o fai lo’u ma’umaga, ma ou te ta’utino atu lava o le matuā telē lava o le tupe e maua mai ai. Auā a lelei ona fai, e mafai ona ave fa’atau ma ave i pusa talo e ave i fafo ma maua mai ai seleni e tausi ai aiga. 

“Ma o la’u fautuaga foi lea i uso o lo’o fa’apalapala ina ia fa’aaoga tatau le malosi e fai ai ma’umaga e tausi ai aiga ma fanau.”

By Sarafina Sanerivi 24 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>