O vevesi e mafua mai i le leai o ni galuega

By Deidre Tautua-Fanene 24 October 2017, 12:00AM

O le lē lava o avanoa faigaluega e mafua ai le tele o vevesi mai i tupulaga talavou i nei onapo.

O le talitonuga lea a le taule’ale’a i ā Atonio Fepuleai o Vaitele Fou.

I le fa’atalatalanoaga a lea taule’ale’a ma le Fofoga o Samoa i le aso ananafi na ia fa’ailoa manino ai se tasi o fa’afitauli tele o lo’o maua i totonu o lona lava afioaga.

“O le fa’afitauli tele lava lea ou te maitauina e le gata i’inei ae fa’apea isi afioaga o le fa’avevesi lea po’o le fufusu o tupulaga talavou,” o lana saunoaga lea.

“E tate va’ai ma le alofa i nai nei uso ona o le fa’aalu sese o le latou malosi ae le fa’aaoga tatau e su’e ai ni galuega e tausi ai aiga ma nai matua.

“O le tele fo’i o taimi e va’ai ai ma le fa’anoanoa ona o le tele lava o taimi o tupulaga ia e leai ni galuega e ō fosi mai tupe mai nisi talavou ia e faigaluega ma o iina e tele ina tula’i mai ai vevesi.

“O le tele fo’i la o taimi e omai ai leoleo e taumafai e fofō le fa’afitauli ae peita’i e tele ina omai nai leoleo ae ua leai nisi ua sosola.

“O nei tulaga uma e tele ina a’afia atu ai ma nai matua ma nai aiga ona o le lē fautuaina o nei tupulaga.

“E mafua mai lava ona o le lē fa’aaoga tatauina o le taimi.

“E tatau lava ona magafagafa lava le tupulaga talavou ia i se tulaga ina ia manuia ai lona aiga ae le o le o e fa’atupu le vevesi ma fufusu solo e leai se mea e maua ai.”

O le taule’ale’a lea e 21 tausaga o lona matua ma o lo’o faigaluega i le Faletalimalo o le Sheraton Aggie Grey.

“O le tele o taimi o tagata mai isi nuu ia e faia lenei tualaga le manuia,” o le saunoaga lea a Atonio.

“E ese le fa’anoanoa o le loto ona o nei uiga e tula’i mai.

“O le vaitau lenei o le itu pito sili lava ona taua o le manuia mo aiga ae leai se aoga o le fa’atupu vevesi solo ma fufusu solo e na o le ta’uvalea ai o le aiga ae leai se manuia.

“O se fautuaga mo nai tupulaga talavou fa’aaoga tatau le taimi auā se lumana’i o aiga ma fa’aalu tatau le malosi.

“O tupulaga o le manuia lea o nuu, aiga, ekalesia aemaise ai le atunu’u e ao fo’I la ona tatou faia ni galuega e ta’ulelei ai tatou ma manuia ai tatou.

“Fa’aaoga tatau le taimi ma le malosi ua i ai, ae le o le fa’aalu sese e leai se aoga ma se mea lelei e maua ai.”

By Deidre Tautua-Fanene 24 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>