E foliga mai e le’i-afaina tele Samoa mai le Afa o Amosa i le taeao ananafi.

Na fa’ailoa mai e Mata’afa Keni Lesa - le Fa’atonu o le Samoa Observer - i le NZ Herald i le taeao ananafi, e la’itit lava nai mea na fa’aleagaina.

“E filemu lava le taeao nei ma ua aga’i uma atu tagata i sauniga masani o le Aso Sa.” 

Na ta’ua e Claire Flynn sa tiute i le Ofisa Va’ai-Tau a Niu Sila, sa fa’aalia i fa’afanua o le ‘auala na valo’ia o le afa lea vaega-tolu, sa na ona fa’ase’ese’e lava i itu i matu o motu ‘autu o Savai’i ma Upolu” ma ua aga’i-‘ese atu ai i le itu i sasa’e.

Na fa’amautuina fo’i e le Fa’atonu o le Ofisa Va’ai-Tau a Samoa, le susuga a Mulipola Ausetalia Titimaea i talanoaga ma le Newstalk ZB e fa’apea, o le Afa o Amosa e “le’i matua malosi na’ua e pei ona sa valo’ia”.  

O le fa’aaliga aupito lata-mai mai le Vaega Va’ai-Tau a Samoa na fa’alauiloa i upega-tafa’iLagi i le fitu i le taeao ananafi, o lo’o ta’ua ai fa’apea, o lapata’iga o se afa o le vaega lua, ua fa’aleaogaina nei Samoa. 

“O lo’o fa’amalosia pea lapata’iga o matagi-afa o le Vaega 1 mo le itu i sasa’e o Upolu.” 

E fa’apena fo’i ona fa’aauau pea ona fa’amalosia o fautuaga mo lologa i nofoaga-maualalo ma le talafatai o le atunu’u ona o galu maualuluga.

O le Afa o Amosa sa tusa lona mamao ma le 72 kilomita i sisifo o Apia i le itula e 4.00 i le vaveao ananafi ma a fua i le ‘auala o aga’i mai ai, o lo’o valo’ia e latalata pe 150 kilomita i sasa’e o Apia, i le itula e tasi i le aoauli. 

O lo’o aga’i atu i sasa’e i sauté-sasa’e o Samoa i le saoasaoa e 28 kilomita i le itula.  

O le a to’ulu-va-va timuga ma mamafa i nisi taimi, ma pa-pa faititili.

O va’aiga i tua atu, o matagi mai le itu i sasa’e i sauté-sasa’e i le va o le 25 – 40 kilomita i le itula, e agi fa’ata’uta’u e o’o atu i le 72 kilomita i le itula mo le itu-sasa’e o Upolu. O galu fo’i e ono o’o atu i le 4.2 – 4.8 mita le maualuluga.

O Seti Afoa o le Leitio Polenisia sa tiute i le taimi atoa o le Afa o Amosa, na ia fa’ailoa i TusiFoliga i le taeao ananafi e fa’apea: “o le Afa o Amosa na liua ma Afa-Aitu ma galoma ‘ese atu anapo po o le itula e tasi – 1.00am). 

Ae sa iai lava a’afiaga o le Afa o Amosa ma mea fo’i na fa’aletonu. O ata sa fa’aalia na va’aia ai ‘auala ua fa’aletonu, o la’au to’ulu i vaega o Savai’i ae maise o lologa i nofoaga o le taulaga i Apia. Sa pepe fo’i moli ona ua motusia le ‘eletise mai nisi o nofoaga na mafulifuli pou-uila ma to’ulu fo’i iai la’au i luga o uaea o nisi vaega o le atun’u.