manatu o le Fa'atonu - Le meaalofa o le foa’i

Tusia Marj Moore ma Faaliliu e Maiava ,

86 Hits

O le tala pito i luma o lau nusipepa nei, i meaalofa fai-fa’aili ua foa’ina e Saina mo le A’oga Tau Musika a le Iunivesete Aoao o Samoa, o le tasi o le anoanoa’i o le ma’au ma le agalelei ua taulimaina e Samoa mai atunu’u ma tagata ‘ese’ese o le lalolagi. 

I Samoa nei, e le tau malaga mamao e sa’ili ni molimau aua o lo’o fau ma soloi i tafa-ala le ma’au lea, e le gata na o Saina a’o isi fo’i o tatou nu’u tua’oi e pei o Niu Sila ma ‘Ausetalia ae maise nu’u mamao e iai Iapani, o Siamani ma Amerika.

Ae iai ma isi. 

O le vaiaso nei fo’i na fai meaalofa ai se tasi Samaria agalelei fa’apea se fa’alapotopotoga mai Siamani, i meafaigaluega mo le Matagaluega o le Soifua Maloloina ma le Pulega o Tinei Mu ma ‘Au’aunaga Fa’afuase’i – o totoga ma mea-faigaluega e le taitai gafatia e latou nei ona fa’atau mai.

O le moni lea, toetoe a le-misi se vaiaso ma fa’ailoa atu e lau nusipepa nei, tala o tagata ta’ito’atasi, o fa’alapotopotoga ma malo ‘ese’ese e agalelei mai, e lagolago ma fa’aopoopo mai o so’o se mea mo o tatou tagata. 

O fale-tetele pei ona va’aia nei, o ‘auala lamolemole ua faia, e o’o i alavai, o taligalu, o le toe fa’afouina o falea’oga ma le anoanoa’i o isi mea-aogā mo le atina’eina o a’oga e aofia ai avanoa fa’aSikolasipi ma tusi-a’oga e mautinoa, e le tau fesiligia le aoga mo tatou i taimi faigata. 

Ae a le mau fesoasaoni e tau le-va’aia, a’o vaega taua fo’i ia ua fa’aleleia ai totonu o a’oga, o kamupani ma fa’alapotopotoga tu-ma’oti; o tagata fa’apitoa e ‘auina mai fa’avaitaimi mo mana’oga fa’apitoa, o polokalame e si’itia ai tomai ma agava’a o tagata faigaluega, o mafutaga fa’aleA’oa’oga ma fesoasoani a tagata e iai poto ma tomai fa’apitoa.  

E le gata la i lea, a o le to’atele o tagata ta’ito’atasi ma fa’alapotopotoga mai atunu’u ‘ese’ese o lo’o ofoina mai o latou tomai ma agava’a i lea tausaga i lea tausaga i nisi o vaega fa’apitoa mo le soifua maloloina lelei ae maise latou o lo’o ‘auala mai ai fesoasoani, o totoga ma mea-fai-tino fou ma mea-tuai e fa’aaoga mo togafitiga ma a’oa’oga.

Ae a le mau tagata o lo’o galulue fua, latou e malaga mamai atunu’u ‘ese’ese o le lalolagi e fesoasoani i so’o se vaega o le malo ma vaega tuma’oti. O nisi e mai Amerika, o Niu Sila ma ‘Ausetalia ma nisi mai le isi itu o le kelope.  

  I le Ofisa o le Samoa Observer i lenei vaiaso, ua to’alua nisi mai Siamani ua ofo-fua mai o la taimi e galulue so’o-so’o-tau’au ai ma le matou ‘aufaigaluega ma maua ai fo’i se isi va’aiga fou, o mafutaga fa’ale-uo fa’apea mafaufauga fou i lenei Ofisa. 

O nei mea uma, e fesoasoani e una’ia ai lo tatou iloa ma le malamalama ma a’oa’oina atili ai; e poto ai ma solo lelei le soifuaga, e puipuia lelei ai lo tatou soifua maloloina ma fesoasoani fo’i mo le ‘ausia o o tatou fa’amoemoega fa’aletagata ae maise le atunu’u aoao. 

Ioe, o se fa’amanuiaga mo tatou uma ma e momoli ai le fa’afetai tele ma le fa’amalo ona o a tatou uo nei ae maise le fesoasoani ua ofoina ma foa’i mai, ua tatou ‘ae’ae ma ‘oli’oli fa’atasi ai. 


© Samoa Observer 2016

Developed by Samoa Observer in Apia