E manuia le ola galue malosi

By Sarafina Sanerivi 25 September 2016, 12:00AM

E tofu lava le tagata ma le taleni na foa’i mai i le Atua. 

O Samuelu Ape mai le afioaga o Vaoala o se tamā e 70 ona tausaga, ma o lana taleni o le faifa’ato’aga. 

E tau ese la’ititi lava le fa’ato’aga o Samuelu mai i isi fa’ato’aga i totonu o Samoa. 

E ui lava ina la’ititi le fanua o lo’o alala ai le tamā ia Samuelu ma lona aiga, ae e le’o avea lenā ma ala e taofia ai le ola galue o le tamā auā foi le faiga o ana meatōtō.

O Samuelu e fai lana togā kapisi ma le fa’ato’aga aniani i autafa lava o lona fale.

“E pei tagataga’i atu i le fanua o le aiga nei, e fai lava si la’ititi o le mea o lo’o fai ai le fa’ato’aga a lenei aiga,” o le fa’aaliga lea a le tama ia Samuelu ina ua afea e le Fofoga o Samoa i le aso ananafi. 

“Na’o le pau lava lea o le fanua o lo’o fai ai nai atina’e ia e fesoasoani ai i mea fai a le aiga aemaise foi le tausiga o fanau ma aiga. 

“O la’u fa’atoaga, e iai kapisi, aniani, tamato, umala, maukeni, kukama ia ma isi lava fuala’auaina.”

Na ta’ua e Samuelu, o le galue e tausoa fa’atasi e lona aiga le faiga ma le va’aiga o le fa’ato’aga. 

Na ia fa’ailoa mai foi, mai le tele o ana fuala’au aina e tōtō, o le aniani lava e tele ina fa’amoemoe iai ma tele le tupe e maua mai ai. 

“E ave lava le fa’amuamua i le tōtōina o le aniani auā e le gata ina faigofie ona tōtō, ae e le pei foi o isi fuala’auaina e iai lava le vaitau e fua ai e iai foi le taimi e lē ola lelei ai. 

“O le aniani e ola fa’asoloatoa ma e seāseā foi iai nisi o lo’o latou tōtōina le aniani. O le ala foi lenā e tele ai ina taulia ma to’atele faleoloa ma tagata e fa’ataua.”

Sa saunoa foi Samuelu ma una’ia le mamalu o le atunu’u ina ia o latou tōtōina le aniani auā e telē le fesoasoani e maua mai ai auā le tausiga o fanau ma aiga. 

“E faigofie lava le tōtōina o le aniani, e leai lava sona faigata. Ia auā o a’u o le faiavā i totonu o le aiga nei, ma ou te sau a’u ia, o le atina’e lava lea o lo’o faia  e le aiga nei e maua mai ai seleni auā mea e fai i totonu o aiga ma nu’u. 

“O se atina’e ua leva ona faia e lenei aiga. E faigofie lava le tōtōina, na’o na fai lava ia lelei le palapala, ia ona fa’apu loa lea i lou lima, ona toto ai lea e ta’ilua lava pe ta’itolu mea e tu’u ai i totonu. E iai foi lava vaila’au e aumai mai le ofisa o fa’ato’aga e fesoasoani ai i le ola a le la’au.

“Ma ou te fiafia lava a’u ia e fai lea atina’e. O la’u fautuaga foi lea i le mamalu o le atunu’u, ina ia fa’aaoga taleni mai le Atua aemaise o fanua e fesoasoani ai i le tausiga o aiga ma fanau.”

Ae peita’i, e ui lava ina feololo se seleni a Samuelu ma lona aiga e maua mai i lona fa’atoaga, na ta’ua e Samuelu, e ‘uti’uti lava le fa’asoa ona o le tele o mea e fai i totonu o nu’u ma alalafaga.

“E na’o le pau lava lenā o le fa’afitauli o lo’o iai pea i totonu o Samoa. O le tele o mea e fai aemaise o fa’alavelave. E uma atu le isi fa’alavelave ae soso’o mai ma lesi fa’alavelave. 

“E tusa lava foi lava po’o le a le iai o tagata faigaluega, e le taitai lava le fa’asoa auā e tele lava ina fa’aalu i mea e fai ma fa’alavelave o aiga.”

By Sarafina Sanerivi 25 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>