Manatu o le Fa’atonu - O le Alofa lava o Le Atua

By Mata'afa Keni Lesa 26 April 2016, 12:00AM

E talitonu ma le atoatoa, i le moni o lena mea. Ae le afaina pe te talitonu iai pe leai fo’i. 

Pau lava lea o le tala e fa’amatalaina ai le tulaga na fa’asaoina ai Samoa mai le afa-  lea na valo’ia e o’o atu i le Vaega 3 i le vaveao o le Aso Sa ma o’o atu ai lava i le Vaega 4 i se taimi o le aso - ua na o se VAVEGA.

O le vavega e pei ona faamatalaina ai, “o se mea e le tupu fa’aNatura pe o ni tulafono fo’i ma talitonuga fa’aSaienitisi.” I se isi fa’aupuga, o mea e le-mafai ona fa’amatalaina e le tagata-soifua.

E mautinoa lava le matua tele o tala a saienitisi ma ē atamamai -  e aofia ai ma tama-sasa’o e va’aia le tau - e tau fa’amatalaina ai a latou mau ma talitonuga ‘ese’ese ma isi mau mea. 

E le afaina lea, aua o le lalolagi lenei, e pule lava le tama a le ‘olomatua ia. 

Ae po’o le a lava po’o le a, pule ‘Oe i le mea e talitonu iai. A o le mea taua lava, ua fa’asaoina lenei atunu’u mai ni a’afiaga fa’aleNatura. 

A lea e talanoa atu, o lo’o maualuga le aoina o le masina ma malolosi ma ua talafeagai ai ona tatou vivi’i ma fa’afetai. 

Pe talitonu i Lagi pe leai, e le-afaina lea. 

O le mea taua  e ao ona manatua, e iai lava mea o le ola nei e le mafai ona fa’amatalaina; e le taitai o’o iai le mafaufau o le tagata-soifua. 

O le mea lea na tupu i le po o le Aso To’ona’i, e talitonu o matou tagata, o se mea fa’apena. 

A mafaufau loloto lava iai, pe afai o ‘Oe o se Kerisiano – e pei ona ta’utino e le to’atele o lo tatou atunu’u – ona leai lava lea o so tatou masalosalo, na tupu le mea ona o Le Atua. 

O Lona suafa lea, o Le Atua Alofa, o se ‘upu ‘ou te fiafia e fa’amatala. Ioe, ua fa’amanuiaina i tatou ona o Lona Alofa, ui lava o tatou o tagata augavale. 

A’o Le Atua lena mo ‘Oe ma a’u. 

O Ia le malamalama, le pule aoao e mafai ai ona faia o so’o se mea e finagalo iai – e aofia ai le fa’ata’apeina o se afa na atu-popole o le a tafi’esea ai tatou mai le lalolagi nei ma mea uma na tatou va’aia ma valo’ia.  

Lenei aso, tatou fa’afetaia ma fa’amanuina Lona A’ao fa’amalumalu. 

Tatou fa’afetai ona o lo’o tatou iai pea ma saogalemu lelei i Samoa nei. Opoopo lou aiga uma ma le fanau ma fa’ailoa iai, lou alofa ia latou uma. O aso ta’itasi uma fo’i, o mea-alofa ma fa’amanuiaga e le tatau lava ona fa’atauagavale iai. 

Lona uiga la, e sili atu tatou nai lo isi e tau-lalata mai ma isi fo’i e mamao ‘ese atu, ae o lo’o feagai pea ma fa’afitauli fa’apea? 

Leai, e le fa’apena. E anoano fo’i o tatou fa’aletonu.

E le ‘ese tatou ma mea o tutupu i isi fo’i vaega o le lalolagi. Aua a silasila toto’a lava i mea o tutupu i le ola nei, i tulaga o faiga-malo ma mafaufauga ‘ese’ese, e manatu lava ua tatou i le va’a lava e tasi. 

A o le uiga lena o se tala, e iai nisi mea e le-mafai ona tau-fa’amatalaina. O le Alofa o Le Atua e fa’apena, e tele lava fo’i ina fesiligia e le tagata-ola i nisi taimi. A o le taimi lava e feagai ai ma fa’afitauli po’o tulaga faigata, o le alofa lava lea e tua iai ma fa’amoemoe iai mo se mapusaga i so’o se mea. 

A tatou talanoa loa i le Alofa o Le Atua, e iai taimi e le malamalama ai. Pe fa’apei lava ona saga alofa mai ma fa’amaoni mai a’o a’u e le o fa’atuatua atu. 

Ae le afaina lea tulaga. 

Tatou te le iloa lava o se mea e tasi ma e ao lava ona tatou ta’utino lea tulaga. 

Lua vaiaso talu ai, na toeititi a malepe atoa Apia ina ua pa ma mu se tane-suau’u. Ioe, na fa’asaoina tagata uma na ono afaina. 

Ae a nei, le Afa o Amosa? 

Ioe, e alofagia lava tatou. 

Ae le o se mea e na ona talia ma talanoa iai. ‘Aua nei iai se lagona mitamita ma foliga ai o tatou ua lelei atu i lo isi uso-a-tagata. 

Ioe le atunu’u e, o le taimi lava ma le mea e tupu ai.

O le taimi e taugamalie ai le soifua ma o le tulaga lena ua iai Samoa i lenei aso ae iai fo’i taimi e le-sologa lelei ai le ola.

O le ‘autu lava ma le fa’amoemoe o nei mea uma, o tatou lava tagata-soifua o Samoa. 

Tatau ona tatou iloa ona tali atu i taimi e fiafia ai ma le taimi fo’i e fesoua’ina ai ma le-lelei le ola.  

E tatau lava ona tatou to’amalie, talia ma le agaga fiafia mea uma ma fa’afetai atu, ona e sese fo’i ala ma fa’atatau a le tagata. 

Tu’u lou fa’atuatuaga i Le Atua, e silafia lelei mea uma na tutupu ananafi, o mea e tutupu i lenei aso ma a-taeao fo’i ma le tulaga e o’o iai. Pau lava lea o lo tatou malosi. 

Fai-fai malie pea ma mau-fetu’una’iga. 

O le ta’ua o lea tulaga, matou te momoli atu ai le fa’afetai tele i vaega uma sa galulue le-malolo i le tele o ‘au’aunaga mo’omia ma fesoasoani fa’avavevave sa tu’uina atu i lo tatou atunu’u, ona sa le-manatu ane lava i lo latou lava saogalemu ma taimi fa’aalu sa tatau ona fa’atasi ai ma aiga i le fa’ai’uga o le vaiaso ona o tapenaga mo le afio mai o Amosa. 

O lo’o talanoa atu i le Komiti Faufautua mo Fa’alavelave Matuia, le Pulega mo Fa’alavelave Fa’afuase’i, o Sui o le Ofisa Va’ai-Tau, le Vaega Tinei Mu, o Leoleo, le Vaega a le Falema’i, le EPC, le Pulega o le Suavai, le Matagaluega o Feso’ota’iga, o Ofisa Fa’asalalau, o pule o faleoloa sa tatala pea mo fa’atauga mulimuli a le mamalu o le atunu’u ma so’o se tasi sa fai-sao a’o tapenapena Samoa mo le afa. E momoli atu le fa’afetai tele ona o la tou tautua. 

Ae mautinoa lava, e le o Amosa le afa mulimuli mo tatou ae taupule soifua pea. Fa’amanuia atu Le Atua. 

(Fa’aliliu e Maiava)



By Mata'afa Keni Lesa 26 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>