1. Matauina i Tala Fou le maoa’e o le viia e Sui Usufono o le Palemene o le Tala o le Tupe a le MInisita fou o Tupe-o Sili Epa Tuioti! O lea la Tala o le Tupe -e aliali mai- e $91.2 miliona ua tuuina atu mo Aoaoga-faatasi ai ma le $86.6 miliona lea ua tuuina atu mo le Matagaluega o le Soifua Maloloina-ma e aliali mai- e peiseai o se taumafaiga lea ia taofiofi ai le soona faaaluina o tupe..!

O lea la ua manino mai-e leai se mea o faia mo le mativa ua i ai nei le atunuu -e ala i le aveeseina o le Lafoga o Tau o Oloa poo le VAGST lea na tulai mai loa le HRPP-fai loa! Afai la ua ave le faamuamua i A’oga ma le Soifua Maloloina-faamata la ua malu ai le atunuu? O le uiga o se faamatalaga-sa fa’ita e ave le faamuamua i Aoga ma le Soifua Maloloina-ona soso’o ai lea ma se fuafuaga mo le atunuu lautele- e tusa ai ma le mativa ua i ai nei!

O le fesili la-o le a le aoga o A’oga pe afai e matitiva matua o le fanau a’oga? O le a le aoga o le Falema’i-pe afai e le o saogalemu le atunuu lautele mai faama’i eseese? O le uiga o se faamatalaga-afai e maua e tagata o le atunuu taumafa tatau tau le soifua maloloina-ona mafai lea ona faaitiitia tagata gasegase. Afai e maua e matua tupe e fafaga ai le fanau a’oga ma totogi ai a’oga-o le a la le aoga o le lelei o A’oga ae leai ni tamaiti e a’oa’oina ai?

Afai o lea tupe tele e mo le faaleleia o a’oga i totonu o le atunuu-ia manatu la-o totogi o faia’oga ma totogi o foma’i ma Tausima’i-o matagaluega lava ia e lua- e peiseai e faainaelo i ai le Malo-ma e le o se mea fou lea-o le mea ua leva ona i ai le peiseai e vaai maulalo faigamalo i nei matagaluega e lua! Ae afai o le pogai lea ua tuuina atu i ai nei tupe tetele i ia matagaluega-ia atonu o le mea lenei ua leva ona tatau ona fai-ma ia faalelei foi ma totogi o Faia’oga, Foma’I ma Tausima’i! Ma e faafetaia ai foi le Minisita fou o Tupe- mo lea fuafuaga!

O le a sou taofi?

2. Matauina foi i Tala Fou se isi ulutala o Tala Fou fai mai o se “Aoa’oga i se faiga e ese ai” ma o lea ulutala e faasino i le valaauina o ni tamaiti a’oga e o atu e matamata i se ata tifaga i le Fale Tifaga o le “Apollo Cinema.”

Ia-e manaia foi lea ituaiga o faiga-talu ai-afai e leai ni tusi faitau e uiga i lea ata tifaga-ua tatau la ona o uma e matamata-ae saili mulimuli ai- ni a latou tusi faitau. Ia afai o se aoaoga lea i se faiga e ese ai-e tatau foi ona mafai ona fai e le tatou Matagaluega o A’oga, Taaloga ma Aganuu-ina ia mafai ai e le fanau-ona malamalama i le Tusi-e faasino i ai lea ata tifaga! O le a sou taofi? 

3. Matauina i Tala Fou se ulutala fai mai- ua faagasolo fuafuaga mo se Fale e Tuu-‘apa- i’a i Matautu.Ua faailoa mai ai foi ma se Kamupani ua resitala i Samoa o le “Huanan Fisheries (Samoa) Company-fai mai o lana fuā-vaa e 50 vaa fagota- e faaaogaina upega uumi-ma o lea o le a faatu e faaaoga ai le Uafu i Matautu e avea ma taulaga o fela’ua’iga o uta oloa a vaa-mo le fua a ia vaa fagota mo a latou maketi i Asia!

O se tala umi lea tala-ae o le mea ua mautinoa-o le Uafu i Matautu o le a faaaoga e lea Kamupani- ae o le Uafu i Satitoa-o le a faaaoga foi e le isi kamupani-ma e i ai le manatu-o se kamupani foi mai Saina! Ia o le tala lena-ae o le fesili-“ O le a le tulaga i le manogi o lea Falei’a e tusa ai ma afioaga o Matautu-Vaiala ma Apia? Na fesiligia ia afioaga mo so latou finagalo faaalia? Afai o le Uafu e i Matautu-o lona uiga la-o eleele o Matautu ia o le a aafia i lea fuafuaga!

Ua fai la se feiloagai ma Mataupu, Vaiala, Apia…..Afai la e tulai mai ai se manogi e le tusa ai ma le Soifua Maloloina-o le a la le mea o le a fai? O le isi itu-afai la o le a o mai uma vaa fagota ia na faatau i ai e le Malo pemita e fagogota ai i sami o Samoa-o le a la le mea o le a tupu i le Taulaga o Apia? Ua outou silafia lava Samoa o lea ua amata ona o mai Tama Sasa’o! O le a sou taofi?

4. Matauina i Tala Fou le anoano o polokalame ua faatino mo le ‘Au-Talavou o le atunuu-ma o le matau la i ai-e mafuli lava i faafiafiaga masani! E tusa ai ma se lagona vaivai-e tele lava isi mea taua sa tatau ona faailoa atu i nei tupulaga talavou.

O le uiga o se manatu-o lea tatou te feagai ma le faafitauli o le ‘Pule i le Ola’-Gaoi ma le Talepe Fale-Tosoteine ma le tele lava o isi soligatulafono fou ua tulai mai!

E i ai la le manatu-ua manaia tele ia  taumafaiga e pei ona vaaia i Tala Fou-ae maumau pe ana aofia ai ma le talanoaina o le tele o faafitauli ia ua tula’i mai totonu o Samoa-ia e manaomia ai le iloa lelei e le tamatane lo la va tapuia ma lona tuafafine-o lona tiute fai i lona tuafafine-ma le tulaga o le tama teine poo le Tamasa-i totonu o lona aiga…! O le a sou taofi?