O le fagotaga po’o le faifaiva, o se mea taua i le olaga.

O le manatu fa’alia lena a Nu’u Smith mai Vailele ma Malaela.

O le fa’atalatalanoaga a le Fofoga o Samoa ma Nu’u, sa ia fa’apea ai, o le tasi o uso o lona tama sa mafua na maua ai lona tomai i le olaga faifaiva ma o lea ua avea ma se tasi o galuega e fiafia e fai.

“O le taimi lenei, o lo’o fai se malologa mo ni nai aso, ia ona toe aga’i atu lea i fagotaga.

“A o’o la i taimi matou te o, pe ta’itolu aso po’o po fo’i matou te o i luga o le sami.

“E ova atu ma le selau ni i’a ta te maua i na aso e tolu.

“Matou te o fa’atasi a la ma isi faifaiva e to’alua, o le matou a la ia vaega na i aso uma.

“A taunu’u mai fo’i la le faiva, ia ona fa’atau fo’i laia o i’a e maua i le maketi lea ii Savalalo aua se seleni.

“Ou te taumafai ai la e fai ma malolo ae e fuafua a le matou malolo i le lelei o le tau mo le faiva, aua a lelei a le tala o le tau, ia o le taimi lelei a na mo fagotaga.

Sa ta’ua fo’i e Nu’u i le Fofoga o Samoa, lanai a fa’asoa i taimi e alu ai a latou fagotaga. 

“O lenei galuega o le faifaiva, e le’o se galuega faigofie ma e mana’omia ia lou malosi atoa, lou fa’amaoni, lou loto toa aua e umi lava se taimi o lo’o e alu ese atu ai ma lou aiga.

“Ae nofonofo i luga o se va’a fagota mo aso e tolu, ia e le’o se tulaga e mafai ona e moe lelei ai aua e saluelue solo le va’a.

“E pau fo’i mea e te va’ai ai; o le sami ma le lagi i luga, i aso uma ma po uma. 

“E iai fo’i taimi e te popole ai pea leaga le tau pe sou fo’i le sami.

“O le galuega faifaiva, o se tasi lea o galuega e tatau ona sai sina tatalo ae e te le’i alu ese atu ma Apia aua tatou te le iloa lava mea e tutupu a ea?

“O se mea e ese mai lava aua ua e le toe i luga o se ‘ele’ele.

“Ma o lea mea fo’i na lea ou te faiatu ai, o le faifaiva e le’o se mea faigofie; e mana’omia ai lou loto toa ma le loto fai mea mafai.”