“Ou te mana’omia le filemu.” O lenei fa’aupuga faigofie, sa mafai e Lepisi Lesatele ona ia famatalaina mai lagona o le isi 44 tagata matutua o lo’o nonofo i Mapuifagalele le nofoaga o lo’o iai tagata matutua.

O lenei nofoaga ua avea ma nofoaga e malolo ai nai o tatou tinā ma tamā matutua.

O Lepisi Lesatele, 66 le matua o lona soifua, e mai le afioaga o Sataua ma sa galue i le Matagaluega o le Soifua Maloloina se’ia o’o lava ina ritaea.

I le tausaga na se’i mavae atu nei sa ulufale mai ai i totonu o le lotoā ale Mapuifagalele, e ui lava i le lē fiafia ai o lana fanau i lana fa’aiuga.

“Na ou ulufale mai i le tausaga na te’a nei, e ui i le taumafai ai o loa’u fanau e taofi ai, ae peita’i ua ou manaomia se filemu,” o lana saunoaga lea.

“O taeao uma lava ou te alu ai lava i misisā, ma o la’u tatalo lava i a Iesu ina ia fa’asino mai se auala ou te maua ai le fiafia.

“E ese lo’u fiafia i lenei nofoaga e ui lava e maua e ma’i o le tino, ae o lo’o puipui lava a’u e Iesu.”

O le tala a lenei Lepisi e le masani ona faitau pe fa’alogo ai fo’i le atunu’u.

O le Mapuifagalele o se fa’alapotopotoga latou te tausia tagata matutua mai aiga lima vaivai o lo’o mana’omia le fesoasoani ae ua le mafai ona latou tausia o latou tua’ā.

Ae peita’i na ta’ua e Sister Lucy e le o se tulaga faigofie i aiga Samoa ona avatu o latou tua’ā tusa lava pe lea lava le fa’asoa e tausi ai.

“O le maitau atu ia Samoa, e ui lava e tausi lelei e tagata o latou tua’ā ma latou alolofa ma le fa’amaoni ma fa’aaloalo iai.

“Ae peita’i o nai isi aiga, e lima vaivai, e to’atele a latou fanau, e tau fai faigaluega uma matua, pe o fo’i e galue i le fa’atoaga ma e leai se isi e tausia lelei nai o latou tua’ā ona e tu’ua na o latou.”

O le maitau a Sister Lucy o le to’atele o nai ni tagata matutua ua le atoatoa le malosi o le tino fa’apea le mafaufau ae le’i taitai ona e le gafatia e latou aiga ona tausi.

I Mapuifagalele lava ia, mai le to’a 45 tagata matutua o lo’o nonof ai, e na o le to’alua lava e mafai ona savavali, a’o le isi to’atele e fa’aaoga uma nofoa fa’ata’avalevale.

“E le matutua tele pe a fa’atusatusa atu i tagata matutua o lo’o i Ni’u Sila ma Ausetalia, mae tusa lava pe o’o atu i le ta’i 100 tausaga o lo’o mafai lava ona savavali,” o le saunoaga lea a Sisiter lucy.

“Ae peita’i o iinei o le toa’tele o tagata e atoa ane le ta’i 50 tausaga ua maua i le stroke ma le ma’i suka ma le totomaualuga, ona o le le lelei o le va’aiga e latou aiga ma o le mafua’aga lea e i’u ai ina maua i ma’i o le mafaufau ma ua le mafai e aiga ona tausia.

“E mana’omia e latou ona ta’e’ele mama, sui, fafaga ma o latou tino ma laulu e tatau ona lelei le vaa’iga.

“Tele o mea matou te maitau e le mafai e aiga ona fai, ae matou te maitauina lava pe a omai e momoli mai o latou tua’ā e latou te manana’o ia va’ai fa’alelei o latou matua ma ia maua le fiafia ma le filemu.”

O Sister Sarah sa avea ma taupousa i le tausaga e 1979 ma sa ia fa’ailoa mai fo’i i le taimi muamua lava sa alu ai e fai lenei galuega o le asiasi i nuu ma tagata matutua, o i na pupula ai ona mata i le telē o le mana’omiaga e nai tagata matutua o le tausi lelei o latou.

Sa ia iloa ai, e le na o le tausiga i le tino o lo’o mana’omia e nei tagata matutua, o lo’o mafatia fo’i i le nonofo to’atasi ona o le tu’ua na’o latou i fale.

“Ua telē lava le suiga i le mafaufau o tagata Samoa i le vaitau lenei, e tatau ona galue auā le tausiga o aiga, ma o isi taimi ua tu’aua ai na o tagata matutua e va’ai e tamaiti ma e le ose itu lelei lea,” o le saunoaga lea a Sister Sarah.

“O nai isi tagata matutua ua tau le manatuaina ni mea, e mafua mai ona o leai o nisi e talatalanoa iai i latou aiga.

“Ua o uma tagata ae tuua na o latou ma tamaiti laiti, ae peitai e ta’aalo lava tamaiti laiti nei ae nofonofo lava nai nei tagata matutua.

“O le isi mafuaaga o fa’alavelave o aiga o lo’o fa’alogologo iai ae o lea latou te malamalama lelei e le lava le fa’asoa i le itu tau seleni ale latou aiga e fai ai nei mau fa’alavelave.”

O le tu ma le aganu’u o le tausi o tatou tagata matutua, ma se fa’alapotopotoga e pei ona ia le Mapuifagalele e foliga mai e le o se nofoaga lelei.

Ae peita’i ona o le to’atele o tagata ua aumau i atunu’u mamao e saili manuia ai o lea la o lenei nofoaga ua avea ma nofoaga lelei e tu’u ai tatou tina ma tama matutua.

E pei ona fa’ailoa mai e le Katinale Pio Tofinu’u lona popole tele i le soifua manuia o ana tagata tausi ma’i ma le soifua matua, na ia fa’ailoa ai le mana’omiaga tele o le fa’avae ai o lea fa’alapotopotoga o Mapuifagalele i totonu o Samoa.

I le tausaga e 1971, na omai ai ni tama’itai sa, ma e fa tausaga o oatu i nuu i tua e fai ai le latou galuega alofa o le tausiga lea o tagata mama’i ma i latou e le atoataoa le malosi o le tino a’o faia ai le galuega, ma o iina na amata ai ona iloa e le lautele le lelei o le galuega o lo’o faia e nei tama’itai sa.

Olenei fa’alapotopotoga o lo’o fa’alagolago tele i mea’alofa mai i so’o se tagata lava auā le fa’afoeina o le latou galuega.

O le talitonuga o nei tama’itai sa, e pei o le latou ta’ita’i o Saint Jeanne Jugan, o se itu lelei le mativa ae fa’alagolago i le Atua i mea uma lava. E o’o lava i le fausiaina o lea nofoaga sa fa’alagolago lava i le Atua.

“O lenei nofoaga o se nofoaga o vavega.

“Matou te fa’alagolago tele i le Atua, ma o le itu tau seleni e omai ma toe o, o nei ua iai, o taeao ua leai.

“Matou te ola i mea ua maua i lea aso, matou te fa’aaogaina lava mea ua matou maua, afai ua leai ona matou fa’atauanau lea i le Atua ma e foa’i mai lava e ia mea e tatau mo le aso.

“Afai e te le talitonu, e tatau ona e fa’ata’ita’ia.

“Ou te le’i talitonu muamua fo’i, ou te le’i iloa ma fa’alagolago i le mana o le fa’alagolago i le Atua, ae ua va’ai tino ai o’u mata, ma so’o se mea lava e ole atu ai i le Atua, e iai lava le tagata e na te fa’ao’oina mai.

“E aumai e le Atua le fesoasoani e ala mai lea i tagata, po’o so’o se mea lava, o isi taimi e iai tagata ua omai aumai latou fesoasoani, ona maligi lea o loimata ona e oo mai lava i le taimi nei matou te le tigaina i se mea.

“O i matou te iloa ai o lo’o fa’atasi mai le Atua ia i matou.”

Sa ta’ua foi e Sister Lucy e le popole latou ise mea e tasi, ma ua ia molimauina foi le fai vavega o le Atua ona o lana foa’i mo latou i aso uma.