O LA’U TALA FO’I

27 July 2016, 12:00AM

1. Matauina i Tala Fou le faatama’ia e le afi o le Faleoloa o Oloa Sii-atoa o le Kamupani a Ah Mau i Apia-lea e faafesaga’i ma le A’oga Maulalo  a le Malisi i Mulivai.

O le matau la i le malosi ma le mata’utia o lenei afi-ua aliali mai ai le matua faatama’ia atoa o lea pisinisi-aemaise ai lava o ana oloa sa teu ai. Ia atonu e le o mautinoa le pogai o lea afi i le taimi nei-ae o le upu lava a le atunuu –e leai se mea e tupu fua!

O lona uiga-e leai se mea e tupu e aunoa ma sona mafuaga.

E mafai la ona tatou faapea –atonu e mafai ona mafua mai se tagata sa ulaula i totonu o lea fale-ia poo le soona lafoa’i solo foi o muli sikaleti a tagata ulaula!

E mafai foi ona faapea atonu e pogai mai se faaletonu tau eletise i totonu o lea lava fale! Ae afai la e le mafua mai lea afi i na mea-e i ai la se fale e nofo lava ia ma susunu ia?

Faamata e le o le faatamala o i latou o loo galulue ai-poo nisi foi o tagata faatau na o’o atu i lea fale? Ae poo le a lava-fai mai le upu e na o le Atua lava na te silafia le pogai-ma o le a iloa lava i se aso!

Ae mo le taimi nei-o lea faalavelave e le taugofie-e matua tele tupe e toe manaomia-ina ia mafai ai ona toe fausia lea fale.

Ae afai o se tasi lenei o pisinisi iloga a Samoa-ua loa ona tautua i le atunuu-o le tuu-a-lalo i le Aiga ona o lea faalavelave-ia onosa’i ma faamoemoe i le Atua aua e na o Ia lava-na te tauia le tautiga o le tagata e faatuatua ia te ia! O le a sou taofi?

2. Matauina ma le faanoanoa le faalavelave na tupu i Tiavi-lea na aafia ai se pasi-ma ua maliu ai Vaa Opetaia o Siumu-talu ai ona manu’a i lea faalavelave.

O le pogai la o lea faalavelave e pei ona faaalia i tala fou-o le saosaoa o lea pasi na mafua ai ona se’e ma taliaga…..!

Afai la tatou te tilotilo i lenei faalavelave ma le faaifo o le pasi i lalo o le a’ega- ae fai mai na matua alu i le atoa-o le molimau moni lenei ma le faamaoni-“o le matua leai lava o sina malamalama o lea avetaavale ma le isi 90 pasene o avetaavale o loo i totonu o Samoa i le taimi nei-i tulafono tau feoaiga i ala tetele!

O lea la ua fua mai le fai o Laisene Avetaavale ae leai ni su’ega aloa’ia e pei ona sa fai muamua mo avetaavale uma- e tusa ai ma le tulafono tau femalagaiga i ala tetele!

A tilotilo la i lenei pasi ma le fai mai na alu i le atoa i lalo o le a’ega- tu i Tiavi-o iinei e aliali mai ai le matua leai o se tulafono tau feoa’iga i ala tetele- e iloa e lenei avepasi.

Fai mai le Tulafono-“o soo se taavale e faaifo i lalo o se a’ega-tu-“e tatau ona tuu le kia o le taavale i le lua poo le tolu- e taofiofi ai le saosaoa o le taavale i lalo.”

Afai la na alu saoasaoa i lalo o le a’ega lea pasi-o lona uiga-sa faa-lusi le kia!Afai la e faa-lusi le kia ae tu’u atu i le taofi ua leai-o le pogai lena o le faalavelave!

Afai la e i ai ni alofa o le Malo mo tagata o le atunuu o loo uia lea ala i aso uma-“ua tatau nei loa lava-ona toe fai faalelei su’ega mo avepasi ma avetaavale uma! O le a sou taofi? 

Matauina foi i Tala Fou fai mai na fasiotia se tamā e to’atolu lana fanau i Vaimea-ma o le maliu o lea alii na faamaonia e se tasi o lona aiga lea na talanoa mai i le Samoa Observer-ae musu e faalauiloa lona suafa.

O le manatu la o le aiga o lea alii-o le ua maliu na fasi e nisi. O lea la faalavelave na tupu a’o aga’i atu o ia i lona aiga ina ua uma ona tafao i se fale kalapu e latalata ane.

E lea o mautinoa e le aiga o lea alii le pogai o lea faalavelave-ma latou te le iloa foi poo fea e o mai ai tupulaga talavou ia na fasia o ia.

O lea la ua tuuina atu lenei mataupu i Leoleo! Ae o le fesili-faamata o le a le pogai ua amio ai faapenei le tupulaga talavou i nei ona po? O ai o una’ia nei tupulaga talavou ina ia amio faapenei?

O fea o i ai matua ma aiga o nei tupulaga talavou-ae o lea ua tuufau e fai lenei amio leaga ma le mataga?

O le tulaga la e peiseai ua manino mai-“e mafua ona amio faapenei tupulaga-ona o le tuufau e matua.”Ua leai se faatonuga-ua peisea’i ua fefefe e faatonu le fanau ma faasino i le olaga e tatau ona ola ai!

O le fesili la-o le a se lagona o ia matua ae foliga se tasi o a latou fanau- i le pagota mata’utia o Samoa i le taimi nei? Faamata e fiafia nei matua i le ta’uvalea ma le faalumaina-aemaise ai o le ta’u ai ma o latou aiga?

O le tulaga lea ua aliali mai nei-ua matua lafoa’i lava le fanau e pule le tamaitiiti ia ma le mea e fai! O le fesili la-“O ai e faamasinoina e le Atua pe a ola leaga le fanau? O le tali-o le matua lava o le tamaitiiti ia!

Afai la e le o kea matua ia latou fanau-o le a se faiga a le Malo e tatau ona fai i ai? Ae o le fesili taua-faamata e mafai ona fai e le malo sea faiga?

Ia manatua lelei-o le faalumaina o le igoa pea o Samoa i le lalolagi atoa i le taimi nei-e mafua mai tupulaga na amata leaga o latou olaga-ma e ui lava ina tuuina atu i le falepuipui-ae sola lava i fafo-ma faaauau pea ona fai mea leaga na o latou faia a’o latiti lava- e aunoa ma se upu a o latou matua na fai i ai e tu’u!

O lea la ua fefeu nei olaga o tupulaga ona o le le faatonuina-ae o le fesili-o ta’u ai se igoa o se tagata ese mai fafo poo ta’u ai lava lou igoa ma le igoa o lou tama ma lo outou aiga! O le a la sou taofi? 

27 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>