TIA O LE VAVAU I SALAFAI-SAPULU SALELOLOGA - Mai le Tusi o le “Suaga a le Vaatele”-

27 July 2016, 12:00AM

 E tolu ana o loo i totonu o lenei vaega-eleele o loo taufai faafesaga’i uma-ma e latalata i le alatele o le Malo. O le igoa o le tasi ana o “Vaiana” a’o le isi o “Pe’atogia. “ O le ana e aupito i sili ona mata’ina- lea o loo i le ituala i uta- e latalata i le lotoa a le EPC. 

O le gutu o le ana lenei- e tapuni i le ma’a ma e tau le mafai ona sao i ai se tagata-ona e fai lava sina la’ititi o lona gutu. E le lava foi se avanoa i totonu-e mafai ai e se tasi ona savali tu-sa’o.

E faigata foi ona maua se ‘ea lelei i totonu o le ana- talu ai e va-apiapi tele. O le tele o le taimi e te i ai i totonu –a le punou -e te faano’uno’u. E le loloto i totonu peitai-afai e te aga’i i sasa’e-e te lagona le gatete atoa o le ana- ona o le feoa’i o taavale i luga a’e. O lona uiga-e alu le ana i lalo o le alatele o le Malo. E pogisa le ana ma e tatau ona i ai se molī-uila e fesoasoani ia te oe. 

O le mea muamua e te vaaia pe a ki lou molī- o tuugamau e faa-ituala lua-a’o totonu e te savali ai. E te sao loa i totonu-ona amata loa lea o le faasologa o laina o tuugamau se’ia tau lava i le vaega i sasa’e-lea e i lalo tonu o le auala tele o le Malo.

O foliga o le fanua-tanu lenei-e ese. E foliga mai -e le tanuina tino oti o tagata ae peiseai e avatu tagata ona faataatitia lea i luga. 

O le pine-e te vaaia ivi o tagata i luga o tuugamau ta’itasi. O lona uiga-o le mea lava e avatu le tagata faa-ta’oto ai , e ta’oto ai lava. I le vaai i le tele o ivi ma ao o tagata-e aliali mai ai-o tagata anamua.

O isi tuugamau e na ona faa-mapu’epu’e faa-lapotopoto lava o  le palapala poo soasoā-ma’a-ona tu’u ai lea o ponaivi i luga. O isi fo’i ivi-ua sulu i lalo o le palapala ona e foliga mai-e sao i ai le suavai i totonu ma ua to’a ai le palapala pipi’i i se tasi vaega o le ana.

E le toatele ni tagata ua vaai i lenei ana- ona e latalata i le fale o le aiga e ona le fanua ma e i totonu lava o faatoaga a lea aiga. 

E le soona faatagaina foi tagata i lenei ana talu ai-o loo nofoia lea fanua. E le gata i lea-e le mana’o le aiga e faataga i ai tagata ona o le naunau e fia puipui i o latou tagata oti, aemaise ai le to’esea o meatotino mai le ana.

Sa faaalia e Pauli e i ai tagata na asiasi i le ana i se taimi e le’i mamao atu e aunoa ma se faatagaga. Ina ua o ese, sa latou aveeseina ni ivi mai le ana. E lei i ai ni aso-ae te’i ua toe tutu atu ma le faaupuga e faapea talu mai le aso na latou aveeseina ai ni ivi mai le ana-sa le mafai ona maua se moe i le po. 

O lea la ua toe o atu ai e faafo’i atu ivi na latou aveesea, faatasi ai ma le faato’esega ina ia faamagalo lo latou aiga. O loo i totonu foi o lenei vaega-eleele pe tusa o le 200 mita mai le magatolu i Salelologa-se maupu’epu’e e igoa o “Valusia” lea fai mai talatuu a’o aga’i atu Pulusau le aitu lea sa fai ona aso i tagata ola.

Fai mai le talatuu a’o aga’i atu Pulusau i le vai taele i luga o le sami i le tasi aso, sa fetaia’i ai ma Sina le alo o Euga-lea na avea ma ana avā, O le aso lava na nonofo ai Pulusau ma Sina-na muta ai foi ma uiga faapaupau o lea alii! 

TAFUA-TAI –E faapea le talatuu o gatai o lenei nuu sa mau ai le i’a foi lea o le “Pa’itele-ae fealua’i solo i le va o Upolu ma Savaii ma faamata’u i tagata femalagaa’i i vaa taualo. Sa malaga mai le taule’ale’a o Alo i le tasi aso i lona paopao ma sa faafuase’i ona osofa’i e lenei I’a. 

Fai mai na folo atoa e le I’a Alo ma lona paopao. Sa faasaga loa Alo ua amata selei mai totonu o le manava o le I’a i ana naifi ‘ofe. E le’i umi ae amata loa ona vili tigā le I’a.

Peitai-sa faasaga pea Alo e fasi mai totonu le I’a. Ua le mafai e le i’a ona onosa’ia le tiga ma o lea na oso ai loa i uta i Safata-ma motusia ai Vaie’e, Fusi ma Fausaga. O isi nofoaga iloga i Tafuatai o le mea lea sa nofo ai Pulusau o le aitu saua i ia ona po. 

O le tasi nofoaga ta’uta’ua o le Papalaulelei. E faigata ona o’o tagata i ia nofoaga se’ia vagana ua o i ni vaa. O loo i ai pea nisi vaega o ala savali i totonu o le vaomatua.

O le vaomatua foi o Tafuatai-o se tasi lea vao e le taumate o loo aofaga uma i ai ituaiga eseese o laau o le vao. O se tasi lenei o vaomatua o loo avea ma nofoaga e tumutumu i ai tagata tafafao mai fafo. (E toe faaauau atu)


27 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>