Sefulu Kolisi o le a ‘auai i le fa’aaliga, ‘Samoa Ne’i Galo.’
O le a fa’amanatu fa’atasi i le masina fou, le polokalame masani O le Teuila, ma le fa’aaliga , le Samoa Ne’i Galo o lenei tausaga.
Na fa’amaonia mai lea fuafuaga, e le Ta’ita’ifono o le Komiti Fa’afoe o le Samoa Ne’i Galo, o Papali’i Peone Fuimaono, i se talanoaga ma sui o le Samoa Observer i le aoauli ananafi.
“E masani lava ona fai le polokalame lea ia Me peita’i, ona o le Fa’aaliga o Tu ma Aganu’u lea sa faia i Guam i le amataga o le tausaga nei, ua suia mai ai i le masina o Setema.
“O se polokalame ua tapena e toe fa’aolaola ai a tatou tu ma aganu’u masani, e ala atu i tulaga tau-a’oa’oga i totonu o le lotoifale o le Pasefika.
“O le fa’amoemoe lava lea, o le fia puipuia lea ma fa’atumauina pea a tatou tu ma aganu’u masani ma fa’alauiloa atu fo’i i isi atunu’u.
“E maua ai se avanoa o tupulaga talavou, e ‘auai i le fa’atinoga o tu ma aga masani a lo tatou atunu’u, ae maise ia iloa aga fa’aaloalo ma malamalama lelei i aganu’u ma so’o se fa’atinoga fa’aSamoa. Ae maise, o se avanoa e una’ia ai le malamalama ma le iloa o aganu’u a’o ‘auai i fa’aaliga a a’oga ‘ese’ese o le a iai.
Na fesiligia Papali’i i vaega o le a fai iai le tauvaga, ae saunoa: “Ua iai nai suiga mo le tauvaga i le tausaga nei.
“O tausaga uma, e iai lava tauvaga o siva ma fa’afiafiaga masani pei o le tausaga talu ai, a’o le tausaga nei la, o le a fa’aaoga faiga-lape a a’oga ae fa’a’autu la i le fa’aluma.
“E va vaega o le a fai aga’i iai le tauvaga. O ma’ulu’ulu, fa’ataupati, o solo ma lape a a’oga.
Na fa’aalia fo’i, e le’i fa’amautuina i le taimi nei, nisi e avea ma fa’amasino.
“O le taimi muamua lea ua ‘ave ai lalo o polokalame o le Teuila ma ‘ou te iloa, ua talafeagai lelei aua, o se vaiaso o fa’afiafiaga fa’aleAganu’u e mafai ona fa’alauiloa ai mea uma nei i le vaiaso e tasi.
“E tumau lava le ‘autu lea, “Samoa Ne’i Galo”.
“O agaga maualuga lea, ia fa’atauaina le gagana ma le fa’aaogaina o ‘upu ua seasea toe fa’alogo iai ma o lea o le a tauva ai kolisi nei e 10 i totonu o le atunu’u, e avea o se vaega o le polokalame o le Teuila o lenei tausaga.
“O le a ‘auai mai fo’i a’oga mai Savai’i, lea fo’i ua fa’aulu mai mo le tausaga fou ona o le taimi ae maise e manana’o e fai ni a latou sa’iliga-seleni mo lea fa’amoemoe.
“O lo’o sologa lelei lava la tapenaga i le taimi nei. O lo’o va’ava’ai solo fo’i mo ni lagolago tau-seleni aua le tauvaga lea ma e talotalo ia o’o atu i le Aso Faraile, ua maua ni kamupani ma nisi e lagolagoina lenei fa’amoemoe.
“Ae iai lava fa’ailoga fa’apitoa i tausaga ta’itasi, e tu’uina atu i le a’oga e aupito fa’aaloalo; o se tasi o vaega taua o le tauvaga e ao ona nofo malamalama ai fanau, i le aogāo le Samoa Ne’i Galo.
“O le tulaga lena ua iai nei a matou tapenaga.”
A’OGA O LE A ‘AUAI I LE TAUVAGA:
• Kolisi o Maluafou
• Faleata
• Avele
• Anoamaa
• Leulumoega Fou
• Sagaga
• Chanel
• Uesele
• Leififi ma
• Aleipata