Talosagaina e se tina se tane vai

By Aruna Lolani 28 April 2017, 12:00AM

O le tasi o mataupu e tele ona fa’atalatalanoaina i totonu o Samoa, o tagata o lo’o mana’omia se fesoasoani i le leai o se vai.

E tele lava mafua’aga e ala ai ona leai se vai sa ta’ua e tagata ma o le mafua’aga a se tasi o tina ia Pesi Senio mai le nu’u o Siumu, o le latou vai sa fa’amotusia  ona ua le totogiina le pili o le vai.

“Sa tipi le matou paipa ona ua o’o le pili i le $1,039 ma o le na aofaiga, sa matou le mafai ona totogi aua e le lava se matou seleni,” o lana tala lea i le Fofoga o Samoa.

“O matou e le’i leva tele ona matou omai i lenei itu, pe e lua tausaga talu ona matou nonofo iinei.

“Ina ua matou taunu’u mai, e to’atele lava tagata o le nu’u e le maua se vai, ma sa latou fa’anoi a la e fa’aaoga le matou vai. Ma o le mafua’aga na ua tele ai le matou pili.

“Ina ua tipi le matou vai, sa matou amata loa ona la’u vai mai tai le aai.

“Ia e totogi a la le ta’avale la’u pasese e o ai e la’u vai.

“Ou te fa’ataua a i le vai i aso uma aua o si a’u fanau o lo’o laiti lava latou ma e mana’omia le vai.

“O le mafuaaga foi lea sa ma talanoa ai ma lo’u to’alua e tatau ona talosagaina se tane vai mai le matagaluega  aua si a’u fanau.

“E to’alima le fanau ,e to’atolu e a’o’oga.

“E leai se matou eletise, matou te fa’aaogaina moli ia e fafaga i le la.

“O nei mea uma e fai i le seleni ma e le se galuega faigofie aua o lo’u to’alua, ua na’o ia e faigaluega. O ia o se faifa’ato’aga, e fa’atau atu meamata mo sina seleni.

Sa ta’ua e lenei tina o le la ma’umaga o lo’o atina’eina i le fanua a le tina o le tama a le aiga.

“Matou te mana’omia lava le vai ma o le mafua’aga lena o lo’o ou talosaga atu ai ma le loto maualalo i so’o sesi e mafai ona fesoasoani mai lea itu.

Samoa, a e fia fesoasoani ia Pesi Senio ma lona aiga, fa’amolemole vili o ia i le numera 7245830 po’o le 7629859.

By Aruna Lolani 28 April 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>