O LA’U TALA FO’I

28 July 2016, 12:00AM

1. Matauina i Tala Fou se uilutala fai mai-“O le mitamita vale faavalevalea- ua tafetotoi ai le atunuu_-ma o lea ua talosagaina e Molio’o Petelo Peters- se faiga e toe faaleleia ai le aganuu.

O le manatu la o Molio’o-o nei tulaga uma ua mafua ai le anoano o lu’itau o loo feagai ma Samoa i le taimi nei.O se lapata’iga la lenei mai le alii faifaatoaga o Molio’o Petelo Peters-ona o le faaaoga sese ma le faatautala o le aganuu. Fai mai Molioo-e amata mai maliu e o’o i faaipoipoga-ua faitau afe ma afe talā lona tau.

O le finagalo la o Molio’o e pei ona faaalia-ua tatau i tagata o le atunuu- ona ala mai-ma faatino ia mea uma e tusa ai ma mea latou te mafai ona fai….! O le talitonuga la o Molio’o-“e ola a’e fo’i a tatou fanau-o le mea lava lea o le a alu ai…!

Ia-atonu o se mataupu lenei e talafeagai ma le atunuu atoa-ma talu ai e eseese lava talitonuga o afioaga ma alalafaga i lenei mataupu-atonu la o se mataupu lenei mo le atunuu atoa-ae mo aiga lava ia-e manaia le faamanatu a Molio’o-aua e leai se aoga e fia tagata ai ma fia tele-ae uma ane le faalavelave ua le mafai ona toe totogi aitalafu! O le a la sou taofi?

2. Matauina foi i Tala Fou- se isi ulutala fai mai-“Ua tuuina mai e le Malo lana folafolaga tau eletise”-ma o lea la ulutala- fai mai o le a matua faaitiitia ai le lafoga tau eletise e amata mai le aso 1 o Aokuso 2016.O lea la tulaga ua mafua ai ona tuuina mai e le Malo lea folafolaga!

Fai mai la -o lea faasilasilaga uiga ese- na tuuina mai e le Taitaifono o le Komiti o Faatonu o le Faalapotopotoga o le Malosi Faa-Eletise- o Pepe Fia’ailetoa Fruean ma le Pule Sili o le E.P.C. -o Tologatā Tile Lei’a.

Ia-o le tala umi lenei tala fou-ae tasi lona-“E matua leai lava ma se upu o lea Faasilasilaga o ta’u mai ai mea nei:-(Pe o le a faaauau pea pe leai ona totogi e le atunuu le aitalafu a le EPC-pe o le a le toe totogiina e le atunuu le tau o le suau’u o loo vili ai le eletise ma isi lava mea..!

Afai la o aofia mea uma o loo ta’ua i luga i lenei folafolaga a le Malo-o lona uiga-“Ua tatau ma onomea ona momoli atu le faafetai tele i le Malo-ona o lea ua aliali mai ua e matua talitonu i le tulaga pagatia o loo i ai nei le atunuu. O le tatalo la-“Ia aveavea’i lou alofa moni i le atunuu-na filifili outou e ta’ita’ina lona Malo-ona e mautinoa ai lea- e faavavau Amene o manatua pea e le atunuu lenei mea uiga ese muamua- ua e faia mo lo latou manuia! O le a sou taofi?

3. Matauina foi i Tala Fou se ulutala fai mai-“Ua matua sasa pala le Falepuipui-ona o le faalumaina o Samoa! Fai mai la lea tala-atonu ua leva ona maliu le Polokalame lea o le “60 Minute”-ae o loo tele pea ma anoano mea o loo faailoa mai e Tuilaepa.

I le taimi nei la-o lea ua liliu atu Tuilaepa i alii ofisa ia e noatia mo le Falepuipui i Tafa’igata-aemaise ai lava le Komesina o Falepuipui ma le Toe Fuata’ina-o Taitosaua Edward Winterstein.

I sana talanoaga ma ni alii kamuta se to’atolu ia na faafaigaluegaina e le “Christchurc Rebuild Programme” ananafi-sa lapata’ina e Tuilaepa ia alii- e uiga i le amio leaga.

Fai mai na ia tuuina atu ia upu ona o le taumafai e puipui le vaaiga i lo tatou atunuu-e tusa ai ma pagota e sosola i tua….! Ia afai la ona pau lea o le mea o loo fai e le Palemia o le tuuina atu o lea fautuaga ma lea fautuaga-ae leai se faiga o faia mo se falepuipui lelei- toe fou e taofi ai pagota amioleaga ma le ta’uvalea ai o le atunuu-o le a la le aoga o ia upu? E mafai e ia upu ona taofi pagota mai le sosola so’o i tua-ma le ta’uvalea ai o le atunuu!

Afai la e leai se tupe e fau ai se falepuipui fou-ae o loo faalagolago foi i fafo mo se isi faaunegatupe ae totogi e le atunuu e fai ai se falepuipui fou-masalo e fai ane lena falepuipui-pe afai e tino mai-ua leai se vaipanoa o Samoa o toe pogisa i atunuu mamao!Ona oo loa lea o Samoa i le tulaga foi lele- o le fai atu e a ma a Samoa- ae toē i ai le lalolagi! O le a sou taofi?

4. Matauina foi i Tala Fou -se ulutala fai mai o i tatou lava e tuua’ia- ona o le taugata o le tatou aganuu…! O lea la finagalo-atonu e mafai ona sa’o-ma e mafai foi ona le sa’o atoatoa! Afai la e eseese faavae o nuu uma o Samoa-o lona uiga la-e tatau foi ona eseese a latou aganuu faatino! Ae ui o lea-faamata e le o faaaoga fua o mea a Papalagi- e pei o tupe ma isi lava mea-ua taugata ai le tatou aganuu? Afai o le aganuu masani a Samoa sa faatino i aso uma –o lona uiga-sa lava ma totoe mea uma sa tapena e aiga mo ia faalavelave!

O lona uiga-afai sa to’a’aga tamaitai o aiga uma e lalaga fale o soo se ituaiga-lalaga ietoga fai ma siapo-o lona uiga-sa tagi lava i lima faalavelave fai o Samoa.

Afai la ua le o toe i ai ni tamaitai matutua faapena o aiga i aso nei-sa gafa ma lea matatā-o lona uiga-ua saili mea uma i le tupe-ma o le pogai lena ua taugata ai le faatinoina o le aganuu masani a Samoa i aso nei!

Ua leai ni faatoaga-leai ni lafu pua’a ma isi lava mea mo faalavelave. Ia manatua foi-e ui lava ina eseese le faatulagaina o faalavelave fai a Samoa mai anamua i aso uma-ae o aso nei-ua taumafai lava le toatele ia sili atu le faatinoina o ia mea i le taimi nei-ma o le pogai lea ua fai mai ai isi ua taugata tele le aganuu-ae le o fai atu le aganuu e faa-taugata! Faamata e le o le fia iloa ma le fia ta’uta’ua o le tagata ua mafua ai? O le mea moni la-o tatou lava e tuua’ia.

A tatou fia tagata loa-ona taugata lea-ae a tatou tausisi lava i le faavae ma le faatinoina o ia faalavelave-e pei ona tatou vaaia i aso ua mavae-ailoga la e ono pagatia ai tatou? O le a sou taofi?

28 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>