Ia fa’a-matagofie Samoa
O le fa’amamāina ai o lo tatou si’osi’omaga o se gaioiga e mana’omia le galulue fa’atasi ai o o tatou tagata i aso uma.
Na maua le fa’atalatalanoaga a le Fofoga o Samoa ma le tamā i a Sagapolutele Talosaga i le aso ananafi, ma o lona lea finagalo fa’aalia a’o faia se galuega a lona ‘auaiga i le fa’amamaina o lo latou fanau i tai o le afio’aga, Si’upapa i Saleapaga.
“Ia o le mea masani lava e ao lava ona o tatou fa’alogo i ai le taimi lenei, o se aiga e mama ma soifua maloloina lona si’osi’omaga o se aiga fiafia tele lea.
“E pei o lea fo’i le taumafaiga o si o matou aiga i lenei fo’i pito e pei ona outou tau mai i ai, o le masani lava lea ua leva sa sau a’i a’o nonofo ai tai nei.
“O lo’u iloa i ai, ia a le saogalemu nofoaga o lo’o o tatou nonofo ai, ia o lea o’o i se isi tulaga ia ma tele ai mai ai fa’ama’i ma nisi o fa’aletonu tatou te le manana’o e tutupu mai.
O le taimi lenei o lo’o ua si’i i le isi vaega o le afio’aga le aiga o Sagapolutele ona o le saogalemu lava mai mala fa’alenatura.
‘Ia e ui lava ina ua fai fo’i si leva e le’i i ai lenei vaega o le atunu’u ae o le mea sili ona taua, o le maua o le taimi e omai ai lava e fa’amama si o matou nei pito, ma o se itu lelei tele lea i lo’u iloa i ai.
“O a’u na ou ola mai lava i totonu o si o matou nu’u nei, ia e tele lava suiga ua maitauina i lenei vaitau ua tatou i ai.
“Ae o le agaga maualuga lava ia a fai i tatou ma fa’ata’ita’iga lele i nai o tatou fanau i le lumana’i ia e leai lava se mea e popole ai.
Na ia fa’ailoa o se itu taua tele le taumafai ai lea ina ia fa’asaogalemuina lo tatou si’osi’omaga i le lumana’i o fanau.
“O le itu taua e ao ona tatou iloa, ia aua le so’ona lafoa’ia lapisi i so’o se mea o tatou manana’o ai.
“Ia e le’o se itu e tau fa’ailoa le tele o vaega ,aua e tusa lava po o le a le taumafai e fa’amama vaega nei ae a le galulue fa’atasi lava ia e le taitai ona maua se tonu lelei aemaise o se taunu’uga lelei.
“E moni lava la i si o matou nei pito ae le taitai lava ona tupu ai aua e malu pulega a ali’i ma faipule, ona o i latou nei latou te va’ava’ai vaega uma aemaise o le matagofie o nu’u ma afio’aga ta’itasi.
Na ia ta’ua e moni e faigata le galulue fa’atasi mo le fa’amamaina o le si’osi’omaga ae a galulue fa’atasi o le a mafaia ai lava.
“O lo tatou lea matafaioi lea, ia o tatou fa’apelepele ma tapena lo tatou si’osi’omaga.