“O le la’ei Samoa - po o le tatau i ali’i ma le malu i tama’ita’i o se la’ei taua tele i le aganu’u a Samoa.” Mulipola Anarosa Molio’o o Faleapuna.

O le afea ai o le Fofoga o Samoa o Mulipola ma le aiga na ia fa’ailoa ai o le taimi lenei ua to’afa o la’ua alo ma le tamā o le aiga ua uma ona tatā

“Ia e to’alima le fanau ma e toe to’atasi lea e fa’amoemoe e ta i le tausaga fou ae o le isi to’afa ia ua ma’ea ona la’ei.

“E mo le silafia ai , ia e le’o so ma’ua mana’o ua mafua ai ona fa’atinoina lea vaega o le aganu’u mo le fanau.

“O lo latou manaoga na fa’aata mai lava i a te’i ma’ua ma le tamā a’o i ai i le fanau i a’oa’oga, ona e talu ai o lo ma’ua titilo ai fo’i, ia e tele le sao taua o le aganu’u mo fanau i lo latou lumana’i, o lea lava la ua fa’atino ai.

“E tele ina o matou auai i so’o se vaega fa’atino i totonu o si o matou nu’u o Faleapuna, ia ma e o lava ma ave le fanau i mea fai o le nu’u.

“E  pei la e maitauina lava o latou e tula’i e fa’atino galuega fa’ataulele’a ia e pei o le itu  o le manaoga o le fanau ia mafai ona laei le tatau ina ia atoatoa ai le tautua a le taule’ale’a ma le tama’ita’i Samoa.

“I le tilotilo atu i ai ia o le laei Samoa lenei e le gata ina laeiina, ae ia tatau ona tapena muamua fanau i matafaioi e fai i totonu o le aiga ia o le nu’u ma nisi o siosiomaga.

“E le gata la ina o tatā ae ua iloa e i ai nisi o vaega e ao ona o latou iloa ae le’i fa’atinoina lea tulaga.

“E iloa lava le tamaita’i i lana aganu’u ma lana tu, ia ma le la’ei ae leai se aoga e pipi’i ai le la’ei ae leiloa fa’atino vaega nei.

“Ia o gatasi ona iloa le fa’atino o tiute fa’atama’ita’i ma taulele’a ma le la’eiina o malofie, e le gata i lea  o le fa’ailoa i ai o lo’o i ai le gafa a le tama’ita’i totonu o le aiga, o le nu’u , ekalesia ma le atunu’u.

Na ia fa’ailoa o le fa’anoanoaga o lo’o i ai le taimi lenei ona ua maitauina ua ‘pei o se fashion le la’ei Samoa po o le tatau ma le malu e pei ona iloa ai i le atunu’u.

 “O lea lava le fa’anoanoaga  i le taimi lenei ona ua pei o se faiga fa’aaliga (fashion) le la’ei Samoa lenei.

“O le uiga o la’u tala , ia e pei lava na’o taimi lava e fa’aaoga ai vaega nei o le aganu’u fa’atoa mafai lea ona va’ava’ai i ai aepeita’i ua le’o lea le tulaga e pei ona maitauina i nei aso.

 “O le popolega ne’i galo atu le taua o le laei Samoa lenei, ia o lea ua tatou va’ai ai ua fa’aopopo ai nisi o vaega, ia e pei o le itu lena ma le popolega lena i a’i tatou, i a te a’u lava ia e leai se si’osi’omaga lava e sili ona taua nai lo totonu o aiga, e amata atu ai le fanau i le iloa o tu ma aganu’u Samoa moni.

“Ia o le una’i lava o tamaiti i totonu o fale o matai , fa’atino matafaioi tama’ita’i Samoa ma tiute fa’ataulele’a le itu pito sili ona taua e tapu’e mai ai lo latou iloa i tu ma aganu’u fa’asamoa moni.