Leai pea se tasi ua masalomia i le maliu i Faleasi’u
O lo’o si’omia pea i lipine-sasama a leoleo i le taimi nei, le maota o se tasi o tina-penisiona na maliu i Faleasi’u, a’o fa’aauau su’esu’ega i le mafuaga o lona maliu.
E o’o mai i le taimi nei, e le’i maua lava le tagata (po’o nisi fo’i) na mafua ai ona o’o le maliu i sia tina matua, lea fa’apea e maua atu i lona fale ua maliu, i nai vaiaso talu ai.
Na ta’ua e le So’o-‘Upu a le Matagaluega o Leoleo, Su’a Muli’aga Tiumalu, o lo’o fa’aauau pea su’esu’ega e sa’ili le mafuaga.
“I le taimi nei, e leai se tasi po’o nisi fo’i ua ‘aumai i le Ofisa nei mo su’esu’ega,”. “E le’i iai lava fo’i se tasi ua masalomia e o’o mai i lenei taimi.” Na ta’ua e Su’a, o le mata’upu lenei, o se mata’upu tau-fasioti-tagata.
Na toe fa’amanatu mai fo’i, o lo’o iai va’aiga ma fa’amaoniga, na osofa’i e se tasi (po’o nisi) le maota lea ae o lo’o sa’ili’ili pea e le matagaluega.
O le tina ua maliu, na fa’atoa maua e lona uso sa asiasi atu iai. Peita’i na ta’ua, na fa’amaonia e foma’i, o lo’o iai fa’ailoga o a’afiaga o lona ua e foliga sa titina e se tasi fa’atasi ma manu’a i lona ulu.