Lauga - “FA’ALOGO I LE ALII”

Tusia Rev. Petaia Setu ,

164 Hits

Rev. Petaia Setu

Rev. Petaia Setu

O mamalu ia o pulega  fa’aleaiga,ma pulega fa’alenuu a Samoa anamua.Ole tofa ale matuatala e taitaiina ai le nuu.Ia poo se fa’autautaga foi ale tu’ua e fai mea faalogo iai aiga ma nuu. O mamalu ia sa manuia ai,sa’oloto ai,ma fai mea fiafia tagata uma aua sa iai le manino,sa iai le sa’o sa soifua manuia ma ola malie ai tagata uma. Ua le’o se tofa lalata poo se fa’autaga papa’u.Ua le faapito ia Tasi manu ao se lelei mo tagata lautele.Ole ala lea ole siufofoga mai le lagi ua tuusao ile  saofaiga,”O lo’u Atalii pele lena ia outoù faalogo iate ia”Manino lelei le siufofoga. Faalogo ia Iesu.

O Iesu,ole Atalii pele ua iai le fa’au’uga ale Atua.Ua iate ia le tofa manino.Ua atofaina iai e le Atua le malamalama i mea uma,ole malamalama ole ola.(f-2)Ua faatamaoaiga ile tumu uma lava ole Atua.Ole pule uma lava male mana e auauna ai i lona Tama i galuega ole fa’aolataga.O lona uiga ua mafatotoga I mea uma,aua  ua sasa’a iai e le Atua lava le tumu o mea uma I lona liliuina ile mamalu silisili ole Atua le Tama.

O luga ole mauga nei,ua ave iai e Iesu on a soo nei o Peteu,Iakopo ma I Ioane se’i vaai ma molimauina le mamalu ole Atua,ma se’i faalogo atu ile poto ole Atua. Ua lilo ia Peteru le fuafuaga paia ale Atua. E ese o tatou manatu,ese le finagalo paia ole Atua.(Isaiah 55:8)Tasi lea vaivaiga ole auaunaga ale tagata.Ua manao e mimilo fuafuaga paia ale Atua I ona manaoga fa’ale tagata.Ua manao e fafao ana pulega faale tagata I polokalame ma fuafuaga ale Atua. Famai Peteru,Le Alii e,e lelei ona tatou nonofo iinei.

O iinei lea tautala ai le soo nei,o luga ole mauga.Ua vaai ile mamalu  fa’aalia ole Atua i luga ole mauga!Ua vaai ile au paia (Mose ma Elia) ua faatasi ma lo latou matai.Ile,ua fuapau le vaai I tumutumu mauga.Ua manao e faatuaoi le galuega ole faaolataga I luga ole mauga.Muamua,ole ute ole afio mai o Iesu Keriso ile lalolagi,ina ia mafuta atu i  tagata ma faaolaina tagata uma I lona maliu. E leai ni tagata I tumutumu mauga.O loo faatali uma mai le galala ole lalolagi I auvaemauga.O lalo,ile mea o iai le motu o tagata e fai ai le galuega.

Lua,e le’o fia vaai Iesu ini fale.O loo fia vaai le Alii i tagata.E le ole fale lana galuega,a’o oe.Ua naunau le faifeau i fale,ae naunau Iesu ile faaolaina o tagata.Le au uso e,tatou vaavaai ile tausia male faaleleia o olaga o tagata uma I la le agaga,ae le ole fa’amamafa o ou manaoga faale tagata.Tolu,e mai le Alii le pule male faatonuga o mea uma ole galuega.

Ele fauina mai ile talatua le taitaiga ole aiga poo le pulega o faiganuu faa Samoa.Toute silafia,na pupuni e le Atua le gutu o Peteru a’o tautala aua e le liliuina ese tagata le tofa pule ale Atua. Faimai Mataio,ole ao pupula ua ufitia ai latou a’o tautala Peteru,male siufofoga mai le ao,”....ia outou faalogo ile Alii.”O lona uiga,e le fai tonu tatou ile Atua, ae faalogo i tatou ile Alii. 

Le au uso e,ole afaina tele lea ole galuega ale Atua,ua tatou fia faaliliuina le finagalo ole Atua I mea ua tatou mananao ai;ile ua taitaiina sese atu ai male tele o tagata. Uso,faalogo ile Alii. E mai le Alii le faatonuina o o tatou tiute ma faiva.’Aua le tau iloa loa sina mea alu loa ile atoa. ‘Aua nei seetia oe ile tai malu.Ia e iloa o tofiga ma galuega uma ua finagalo ai le Atua mole manuia male faaolaina o lana fanau e mai le Atua lava mole Atua.

Na avatu e le Atua le fa’aaliga ia Peteru e tatala ai ona ‘ai i mea uma ae teena ele so’o(Galuega 10 :11-16).Ua fa’alala atu e Peteru tulafono ma faavae ole lotu Iutaia.Ua taumafai le tagata e ta’u atu ile Atua lona sa’o ma lona atoatoa ile tausiga o tulafono male fa’amamaluina o pulega faale tagata. Ua finau manatu ole lalolagi e vavao ma taofi le pule fa’aola ale Atua ile lalolagi uma na pogai ai ona afio mai Iesu e maliu i lo tatou lalolagi.Ole faatonuga ale Atua ia Peteru,O mea ua ou faiatu ai e fai,o mea na e fai.O lea le Tala?Ele taumasina le tagata male Atua. Ua tu’u le faavae ma tulafono ole feagaiga tuai ae faalogo ma savali ile fa’asinoga ale Atua ua faatonuina ai.Ua ta’oto le iloa male malosi ole tagata,ae punou ile taitaiga a Le na faia mea uma lava. 

Amuia oe pe afai o’e iloa lo oulua vatapuia ma Le na faia oe.Amuia oe pe afai o’e faalogo ia Iesu ma olaina lona finagalo. Ose aiga manuia se aiga ua ali’ita’i ia Keriso Iesu.Mai fea ona fefa’amasinoa’i?Ae afua ise a ona oulua feupua’i ma femisaa’i?Aisea ua tau ai le ao tau le po? Sena  e,nofo lelei I lalo ma tatalo.

O sa’o lau faalogo? Ia e manatua,ua iai foi le tiapolo I mea uma lava. Ae oute tautino atu iate oe,afai ete matua faalogo lelei ma usitai ile siufofoga ole Agaga Paia I lou loto,ete matua solipalaina gata ma akarava ma togafiti leaga uma ale tiapolo. Ele ua malepe ea aiga ma fememea’i fanau ona ua avaga lau faalogo I ou tuinanau?Ele ua vavaeesea ea oe mai lou aiga ona ua sese le leo ua e faalogo iai? Ua faaletonu lau galuega ma afaina lau aoga ona ua e faalogologo leo?Le fanau e,ia Keriso,e faapei ona pele ile Atua lona atalii,e faapena foi ona pele oe ile Atua. E alofa faamaoni le Atua iate oe. Faimai le siufofoga mai le lagi, “...Oute alofa ia Iesu,ia outou faalogo ia te ia.”

Samoa e,ua tuuina ele Tama le pule uma lava ile Atalii e tausi ai oe ma lou aiga.Ole poto e faatonu ma taitaiina ai oe I lau aoga ma lau galuega. Ole alofa male malosi e fai ai lau fatuaiga tausi.Ole amiotonu male faamaoni e sa’oloto ma ola manuia ai ekalesia male atunuu.Aisea e saga lualuagia ai pea lau faalogo? Ete le maona ile alofa ole Atua?Pe lei lava ea lona tino ma lona toto e faamagalo ai lou tagata amioleaga ma faamalolo ai ou ma’i?Ele lua ni leo ete faalogo iai.Uso e,ia outou faalogo ile Alii. 

Samoa,onosai.Onosai e faalogo ile Alii.E mautinoa e inu ai lau fanau i faamanuiagà.E maopopo ai aiga ma nuu. E olioli ai ma ola manuia tagata uma ole ekalesia male atunuu. Faalogo ile Alli ete mafaia ai ona tineia le fili ma fo’ia ou faafitauli.’Aua ete sola ese mai faafitauli a ia vivii ile Atua ma fa’afetaia le Atua i ou faafitauli.

O lona poto ma lona mana e faaumatia ai ou faafitauli uma lava ina ua e faalogo ma talia o ia I lou olaga. Faapei ona vaai Peteru,Iakopo,ma Ioane ile malamalama uiga ese ole fa’au’uga ale Atua i lona Alo,e faapena foi ona e manumalo I mea uma ile fa’au’uga ale Agaga Paia I lou loto. Faalogo nei loa ile taitaiga a Le Agaga Paia.Faigofie pe faigata,mamafa pe mama,vevela poo le malulu,tiga pe to’afilemu,faalogo ia Iesu. Faauta foi,ole siufofoga mai le ao ua faapea mai,”O lo’u Atalii pele lena.....Ia outou faalogo ia te ia.”

 

Amene.

7737063

© Samoa Observer 2016

Developed by Samoa Observer in Apia