Le galuega lenā

Tusia Rev. Petaia Setu ,

190 Hits

Rev. Petaia Setu

Rev. Petaia Setu

O taimi ia o le saa faaoti o le utu. E măsua ai le faapolopolo. E leai foi se faatoe i le muli ola. O le toe mea lea. E atoa iai tapuaiga o upu ma tala, o loto ma agaga , o lagona ma aga o faamanuiaga. Ua uma upu (theory), a ua aga atu i taga (practice). O foliga ia tatou te vaai ma faalogo ai i mea nei o faauuga. E pei o le taimi lea e tuuina faapitoa atu ai se malosi uiga ese e faatino ai galuega o le isi laasaga fou. ’Ai ona o le Atua! Auā o faauuga uma e mamalu ona o le suafa o le Atua Soifua.

O Saulo, sa faauuina e le tasi o soo na auina ane e le Alii, o Anania lona igoa. Sa na faaee atu ona lima i luga o Saulo, o lima faaola; o lima alofa. O le faailoga o le faamausaliina o le filifiliga ma le tofia aloaia mai e le Alii mo le faamoemoe tāua. O le faaeeina atu o le pule e taitai ai i le alofa, ma tausi ai ia ola. O lima ia na te suia lima taufaamata’u sa ia Saulo i lima o faamalologa. E liliuina lima fasioti tagata i lima o le faaolataga; o lima lē alofa, i lima o le saolotoga; o lima le popoi ma le sauā, i lima alofa ma le talitigā. Ua le toe manatua e Saulo le olaga leaga ma le toilalo sa ola ai. Ua leva ona avea ma faresaio, ma loia, ma faifeau, ae le i faaolaina. E taulagi tulafono a Mose, a o se iloa o le Atua e oge.

E pei lava o le isi foi tauaso lea sa fai iai Iesu, E ao ina toe fanau mai outou (Ioane. 3:3,7). O lona uiga, o le faaeeina atu o lima i ou luga, e le māmā. Ia e iloa, ua le o se palealii, a o le satauro. Uso, e mamafa le galuega. Ioe, e mamafa i le tagata na te lagonaina le faamoemoe o le Atua ia te ia ma alofa i le Atua. E mamafa i le tagata na te iloa o ia na valaauina mai e le Atua ae le o le unai faamalosi ma tauanau e le isi tagata.

 O le isi tapenaga tāua, o lau vaai. O le feau lea na sau ma Anania, ia toe vaai Saulo. O lona uiga, o le masau sa pupula muamua ai mata o Saulo e le aogā i le galuega. E le o mata faasiasia ma le sauā. E le o le pupula taufaavalea ma le mana’o mea. E le o le pupula i tuinanauga ma le matape’ape’a. O mata o le lalolagi sa punitia ai e le Alii le vaai a Saulo. Ua oo ile taimi o le Alii. E manaomia ona toe pupula ou mata i tapenaga faaleagaga. O mata faaleagaga e maua ai agaga. Mata ua faapaiaina. E sa’o ai lau pupula.

E manino ai lau vaai. Le vaai e tutusa uma ai tagata i lau tausiga. Le vaai e iloa ai tigā ma mafatiaga o tagata. Le vaai e ola ai le mativa ma le matelaina. Le au uso e, o lau vaai e manuia ai le galuega; o lau vaai foi e faaletonu ai le galuega. ’Aua e te vaai mo oe ma lou aiga. O le valaauina o Saulo, o le vaai mamao. Momoli le igoa o Iesu i nuu ese, i luma o tupu, ma le fanauga a Isaraelu. E le o lou igoa poo se igoa o se lotu poo se ekalesia. O le galuega a Iesu. Momoli ma tala’i atu le suafa o Iesu Keriso, o lē sa faaali ia te oe i le ala na e sau ai; o lē na filifilia ma valaauina lou tagata mo lana galuega molimau o le faaolataga. 

 

Pupula sa’o i le Alii, ma vaai toto’a i lou valaauina. Toe vaai lelei iai; ma ia faafouina lau vaai mo taeao ma le lumanai.

O le tapenaga atoa o le tagata, o fafo ma totonu. E taitai ma faatonu e le Agaga. E afio mai ia te ia le Agaga o Ieova. O le Agaga o le poto ma le mafaufau, o le Agaga o le faatonuga ma le malosi o le Agaga o le malamalama ma le mata’u ia Ieova (Isa.11:2).

 O la le soo nei o Anania ia Saulo, ua auina mai a’u ina ia e toe vaai, ma ia faatumuina oe i le Agaga Paia. A mea o le ute lea o faiga mea. Se ā le uiga pe a le iai le Agaga o le Atua? (Ioane.15:5). O le taiala lea. O le Fesoasoani lea sa taulagi e Iesu mo le galuega molimau a le au soo. O le mana lea na te faatonu ma faamalosi ia i tatou uma i le galuega. Poo le a lava le ituaiga galuega o loo e tautua ai afai e oge oe ma le Agaga o le Atua, e maumau fua ona e galue. O loo molimau a tatou galuega i pulega faale malo ma pulega faale ekalesia.

E le o mafai ona atoatoa auā ua le o ia i tatou le Agaga Paia. O loo auina mai e le Atua le Agaga Paia, ae tatou te le o talia ona ua tatou mananao e fai i la tatou pule ma la tatou lava faitalia. Maumau pe ana se I faataga le Agaga o le Atua i lou loto na te faatonu ma faafoeina ou faiva, ona e vaai lea i faamanuiaga i lou olaga, o lou aiga, o lau a’oga, galuega, ma mea uma e te fai. Manatua foi le au soo o Iesu e le o ta’ua ni a latou a’oga, ae na ona palasi lava iai o le Agaga Paia ona a’o’oga uma ai lava lea o le au fai faailoga o le lalolagi a ea? O le mana (power) lenā sa taita’ia Paulo i lana  galuega i mea uma lava seia oo lava i le iuga o lona faamoemoe (Filipi.1:21). Fai mai Iesu, e tupu mai ai le upu moni (Ioane.14:17)

Le  ekalesia e, e tupu le faatuatua i le taulogologo atu. Ua anoanoa’i le mau faafitauli ma luitau i lo tatou faatuatuaga faakerisiano. Ua le masino foi le mau faalavelave ma mea matuia e osofia ai lo tatou siomaga faale talalelei. O upu faamalosi ma faamanuia a Feepo i lona atalii, ia pouliuli lou tino, a ia malamalama ou mata. O la Paulo ia Timoteo, ia e faautauta, ma ia faatamatane. Fai mai Iesu i lona au soo, ia outou fifilemu e pei o le lupe, a ia atamai e pei o le gata. A o se a se tapenaga mo oe ma le galuega i lenei foi tausaga faale ekalesia? Poo e lagonaina manu’a o le galuega a Keriso? Poo e iloa o le fili numera tasi o le galuega a le Alii o oe lava? Poo e iloa o loo iai le fuafuaga a le Atua ia te oe? Uso e, o le faaee atu o lima i luga ia te oe, o le faamoemoe o le Atua mo se oe fou.

Se oe sa’o; se oe ola. Se oe toa na te toe fuataiina le ola faale agaga o le ekalesia. Ia toe vaai lelei la ia i mea lelei; i mea tonu; i mea e manuia ai le galuega ma ola saoloto ai le fanau a le Atua. Ma ia e mautinoa, o le faatumuina o oe i le Agaga Paia e te manumalo ai i faafitauli uma o loo faatali mai o le galuega. O le faauuga a le Atua o le mea sili lea ona manaomia mo lou faigaluega, e faailoa mai ai le pule taitaiina a le Agaga Paia i lou soifua auauna. O le tatalo, ia faatumuina oe e le Agaga Paia. Le au uso e, le galuega lenā. Ia manūteleina ou faiva.

 

Amene

7737063/7783782

© Samoa Observer 2016

Developed by Samoa Observer in Apia