Manumalo Eliziuritabeth Fanueli i Sa’iliga Fetu o Samoa, 2016

By Deidre Fanene 29 August 2016, 12:00AM

O le tama’ita’i 15 tausaga mai To’omatagi, o Eliziuritabeth Fanueli, ua manumalo nei ma avea o le Fetu o lenei tausaga.

Na tumutumu le Fale Ta’alo Numera 1i le po o le Aso To’onai talu ai, i le mamalu o le atunu’u, o aiga ma uo o le to’alima sa finau i le po mulimuli o le tauvaga.

O Anufesaina Chan Mow, o le sui o le Kamupani a Amau – le lagolago ‘autu o le tauvaga, sa fa’afetaia sui-tauva uma sa ‘auai i le tauvaga o lenei tausaga.  

 “Avea a’u nei ma sui o le Kamupani a Amau, e fa’afeiloa’i atu i le mamalu o ‘auvala’aulia ua mafai ona fa’atasi mai ae maise fo’i le mamalu tele o le atunu’u o lo’o fa’afogafoga ma maimoa mai i maota ma laoa i le po mulimuli lenei, o le Sa’iliga o se Fetu o Samoa mo le 2016.

“E momoli le fa’afetai fa’apitoa i matua ma aiga uma o sui-tauva ma latou sa fesoasoani tele i le tapenaina o latou nei, mai lava i le ulua’i aso o le tauvaga e o’o mai i lenei po.

“Seanoa la tou fesoasoani ma le lagolago, e le mafai ona ‘ausia le maualuga ua iai le Sa’iliga Fetua a Samoa.

“Fa’afetai tele atu fo’i i Fa’amasino mo fautuaga lelei sa tu’uina atu i sui-tauva, aua lava le fa’aleleia atili o taleni ua foa’ina iai e Le Atua.”  O le to’alima mulimuli sa tauva mo le manumalo, e aofia ai Tu’u’au Ma’auga Motu o Vailele, Desmond Rokeni o Nuu, Mona Lio o Vaimoso, Eliziuritabeth Fanueli o Toomatagai ma Lanuola Kesa o Tufulele.

E lua vaega sa fai aga’i iai le tauvaga mulimuli lea, o le Pese Samoa ma le Pese e filifilia lava e le sui-tauva, o Pese Fa’apapalagi.

I le fa’ai’uga o vaega e lua, na ‘au’au-fa’atasi ai le mamalu o le atunu’u ma Susuga a Fa’amasino, e tu’uina atu le manumalo i le tama’ita’i 15 tausaga o Eliziuritabeth Fanueli. 

O ia fo’i na manumalo i le fa’ailoga “O le Tagata Pese Filifilia a le Atunu’u” ae tulaga lua ai Mona Lio o Vaimoso.

E tasi lava ma le ‘afa (1.5) togi na ‘ese’ese ai Eliziuritabeth ma Mona, lea na fa’ailoa e le Fofoga o le Po, o se tauvaga va-va-lalata tele. 

O fa’ailoga o le manumalo e aofia ai le fa’ailoga tupe e ono-afe tala ($6,000.00) ma pepa malaga-fua i Niu Sila, mo tagata e to’alua, na saunia e kamupani sa lagolagoina le tauvaga o lenei tausaga. 

O isi fa’ailoga, e aofia ai le ta’i afe-tala mo sui-tauva na ‘ausia le ta’amilosaga mulimuli ma isi fa’ailoga fa’aopoopo.  

By Deidre Fanene 29 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>