“Seki a Samoa,” Faye

By Sarafina Sanerivi 29 December 2016, 12:00AM

O le finagalo o Faye Kelepi mai le afioaga o Faleula, e faigofie lava le olaga i Samoa. 

Aepeita’i, na ia ta’ua e iai lava nisi vaega e mafua ai ona faigata le olaga i Samoa. 

O Faye e 23 ona tausaga, ma na ia fa’aalia mai i le Fofoga o Samoa, e faigofie lava le olaga i Samoa. 

Na ta’ua  e Faye, o le tele o le mau fa’alavelave i Samoa e mafua ai ona fa’afaigata le olaga i nisi o taimi. “E ese lava le olaga i Samoa pe a fa’atusatusa atu i isi atunu’u.

“O isi atunu’u, e su’e a latou tupe ona o lea e tafafao solo ma fiafia i isi atunu’u. Ae o Samoa, e sefe a latou tupe e fai ai fa’alavelave ma mea e fai a aiga.

“E mo’i lava e faigofie le olaga i Samoa, ae iai lava taimi e fa’afaigata ai. Ae le fua tasi la ise aiga po se atunu’u.”

Na ta’ua  e Faye, e sili atu lava Samoa nai lo’o isi lava atunu’u.

“O la’u lava autilotilo iai, e sili lava Samoa. 

“E mo’i lava e iai fa’afitauli, ae e iai lava le auala e fofo ai fa’afitauli. E faigofie lava ona soalaupule fa’afitauli e feagai a ma o tatou tagata.

“O le mafuta lava i le Atua ma tulivae i le Atua e ala i le tatalo e manuia ma faigofie ai mea uma.

“O la’u tala mo’i lava ia te oe, e le taitai ona ou fia alu ese ma Samoa.

“Tusa lava pe ou te mativa, ou te fiafia lava a’u ia i Samoa.

“A e taga’i foi i lo matou faleo’o, ua fia sefulu ni afā e a’afia ai si o matou faleo’o, ae e le fa’apea lava ua malepe ai.

“O le olaga lava ia i Samoa, e tatau lava ona e tu lava oe ia mo oe ma lou aiga.

“E sa’o ai lava le fetalaiga a le afioga i le Palemia o Samoa, e a la ona matitiva tagata o le nofoa’i ae le galulue.

“A punoua’i le tagata ma galue malosi mo lona aiga, e leai lava se mea e popole ai. 

“O le mea lea ou te fiafia ai lava a’u ia i le olaga i Samoa.

“E faigofie ma maua gofie mea e tausi ai lo tatou ola.”

By Sarafina Sanerivi 29 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>