O le naunauta’iga o le tinā i a Vaiaga Simi, 50, le matua o le soifua mai Aleisa Uta, o se eletise ma se suavai mo si ona aiga.

Sa ia fa’ailoa i le Fofoga o Samoa ananafi le faigata o le tulaga o lo’o i ai si o latou aiga ona e fai o le mamao i uta o le nofoaga e i ai ae o le lē a’e atu o le suavai i le latou fale.

Sa ta’ua e Vaiaga e le’i leva ona latou nofoia lea nofoaga ae o le to’atele o tagata o lo’o i ai sa fa’ailoa i lea tina ua loa tausaga o le fa’afitauli lava lea i lea nofoaga.

“Ia e ese le faigata o lenei mea e fai o le leai o se vai a’o le leai foi o se eletise,” Le saunoaga lea a Vaiaga.

“Faafetai lava i le Atua mo le timu lea ua maua ai se suavai mo matou i lenei taimi, ae o lea foi ua toe va’aia le susulu o le la ua toe ‘atu foi le loto ona o lea foi o le a toe fa’afesaga’i ma le pologa.

“Ae sei i ai foi sina tane vae e tau ina mapu ane ai ona o lea ua oo i le vaitaimi o mugāla.”

Sa ia fa’aalia foi le tulaga o loo i ai i lo latou fale ma e le i ai se soifua maloloina e ono maua ai.

“Ua e vaai atu ai nei e na o kaloge lava ia e faatali ai le vai ua leiloa e matou poo fea a matou o i ai.

“O le vai e gata lava i tai le aai ae le oo mai iinei e oo foi i le matou fale ua e taga’i atu i le elea o apa o le fale e le aoga ona inuina le vai.

“O la matou galuega la e fai o le faapuna o vai e fai ai meaai ma feinu ai ona e le aoga ona inu faapea.

“E telē lava le fa’afitauli lea matou te nonofo ma matou ae o matou foi e gata ai le auala e mamao mai foi ma le auala tele.

“O se tasi tamā o loo i luma atu lona fale e leai foi se suavai ae fai ana taavale, ma o ia lena o loo fesoasoani mai a alu e ti vai ona matou o faatasi ai lea ina ia maua mai se suavai mo matou.”

Sa fa’ailoa mai e Vaiaga e le na o le pau lea o le faafitauli o loo feagai ma ia ma si ona aiga.

“O lesi faafitauli ona matou te le’o i totonu o le komiti a le nuu e leiloa foi la poo ai a sulu i ai ina ia talosaga i ai se tane vai mo matou.

“Ua leiloa poo le a le mea ua faapea o lea o le a oo mai lava le tausaga o lenei lava e pologa faapenei.

“Ua leva ona matou fia mumu i se moli eletise ao lenei e tau pulapula i le moli matagi.

E mamao mai foi i tua nei le matou fale ua laki lava o le masina lea ua oso mai ua tau malamalama ai lenei vaitaimi.

“Ana faapea foi o lea e ola le moli o le pou lea e tu tonu lava i luma o le matou fale e leai lava se mea e popole ai.

“E fai si pogisa o le nofoaga lenei ou te popole foi i si au tama teine ona o lo matou fale foi e ta’alaelae ae o lenei vaitau ua le toe lelei fo’i.

“A leai loa se masina ua toe foi lava i le mea tuai o le pogisa fa’asoloatoa ae o le tulaga lea e i ai e tope lava feau ma le meaai i le afiafi ae lei pogisa ona a oo mai le po ia ua malolo foi ma momoe.

“E leai sesi e toe fealua’i pe a po ona o le pogisa tele o lenei nofoaga o nai fa’afitauli na ia e mafatia ai si matou aiga i lenei vaitau atonu o le a alofa mai sesi mo se fesoasoani mo matou.”