To’avalu Fa’a’e’e Suafa Matai Fou
O le fa’amoemoe ua taunu’u o le La’au lea o le Ola.
O lea le fa’afetai na fa’aleoina e le aiga o Laumatia ma Tunumafono i Fausaga Safata ina ua fa’ae’e nisi o suafa matai o lo latou aiga ananafi i le maota o Moemanogi.
Na fa’aleoina e se tasi o Suafa Fou i a Toleafoa Sesilia le agaga fa’afetai ona ua taunu’u ma le manuia le fa’amoemoe na alo atu ai le aiga.
“Ia e pei o lea lava le agaga fa’afetai i a te a’u aemaise o sui o si o matou aiga, e le faigofie aua o le tofi e auauna e le se tofi e nofonofo ai.
“I lo’u ia iloa i ai, ia o le a taumafai i le gata e mafai ai e auauna ma tautua aiga, nu’u ekalesia ma le atunu’u.
“O le lagona lava lea e tasi o lo’o ua taumafai ai nei o le mafai ai lea ona fa’ataunu’ui na o vaega nei, ma o le fa’afetai sili lea i le Atua Soifua.
“Ua o tatou iloa nei aso ia ua le tulaga faigofie le fa’ae’eina ni suafa matai ona ua tele ina va ai aiga, ae o le manatu maualuga o i matou nei.
“O a mea ua mafai ona fai, o le viiga lea e fo’i i le Atua aua o ia na mafua ai nei mea uma.
O le fa’amoemoega ia tautua aiga.
“Ia e pei o lea lava le tulaga ua va’ava’ai atu ai le taimi lenei, e le mafai lava ona fai na’o se to’atasi ni vaega e fa’atinoina mo le lelei o aiga.
“E mana’omia le galulue fa’atasi aemaise o le so’oso’o tauau aua o lea lava le fiafiaga aemaise o le atoaga i totonu o aiga.
“O le itu mautinoa, ana leai le fa’atasi mai o le Atua ailoga e i’u ma le manuia nei vaega uma.
“Ae fa’afetai i le Atua i le ola ma le malosi, ma o le agaga maualuga ia tau fai maua fa’atasi le fiafia aemaise o le ola fealofani.
“Ia fa’avae mea uma i le alofa aemaise o le fa’alagolago lea i le Atua i so’o se taumafaiga o lo’o ua i ai le taimi lenei.
“E mafai mea uma ona ua i ai le Atua, ma o lea lava le fa’amalosia’u o lo’o i a’i matou uma lava aua le aga’i atu ai le lumanai.
Na fa’aiu lea aso tele i fa’aaloaloga masani.