E faigata le olaga pea leai se vai

By Aruna Lolani 30 March 2017, 12:00AM

A leai se vai, o se tulaga faigata fo’i lena i aso uma o lou olaga. 

E mana’omia le vai mo mea toto ina ia ola lelei ma mafai ona fa’atau atu aua se su’eina o se seleni. A leai se vai, leai se mea toto, e pei a leai se vai, o le leai fo’i lena o se ola. 

O Elaine Iopu e sau mai le nu’u o Faleula ma sa ia ta’ua i le Fofoga o Samoa, o le olaga ua le toe faigofie ma o se itu e pito sili ona faigata le leai o se vai mo lo latou aiga. 

“O le fa’afitauli a na i le matou aiga, o le vai.” O lana tala lea i le Fofoga o Samoa. 

 “E le’o na’o le matou aiga e lavea i lea tulaga, e fa’apena fo’i isi aiga i le matou nu’u.  

 “O matou a la ia e maua mai a matou vai i tua’oi ae o se itu fo’i ta te maasiasi ai pe’a fai so’o.  

“A’o isi a taimi e matou te savali solo i le nu’u aua le tau su’eina o le vai.  

“Pei o se itu a lea e lagona ai le mafatia. E le tele fo’i se matou tupe maua, ia a’o lea e taumafai lava e sefe aua se tane vai.”

“E laki a i nai aiga ia e fai a latou tane vai.

“A timu loa la, ia matou te lagona fo’i le loto fa’afetai aua ua maua fo’i sina vai mo lo matou aiga.

“O lo’o matou taumafai pea e atina’e le aiga,” o lana tala lea.

“A e faigata na toto ma fa’aola le ma’umaga pea leai se vai.

“O se mea la lena o lo’o matou mana’omia ai se fesoasoani aua e le tele se matou tupe e maua, o ma’ua fo’i ma lo’u to’alua ma te le faigaluega, ia ma le ma fale o le tama’i faleo’o, a lea a ma te taumafai ia maua se lelei. 

“O a’u fo’i la ia, ou te le manatu tele i isi mea ae pei a ole vai lea o lo’o matou talosaga atu ai.”

Sa ta’ua fo’i e Elaine o lona to’alua e igoa ia Tusiga, o lo’o su’e galuega ma e mana’omia lava e ia se galuega. 

“Ou te aioi atu ai fo’i i le kamupani o Ah Liki pe e toe tali mai, aua o latou ia lea sa avatu ai le tusi a si o’u to’alua mo se galuega, ua tolu nei la masina lea e fa’atali.  

 “Ou te fa’afetai a a’u ia o lea e laiti la’u fanau aua a na fa’apea ua a’o’oga, ia o le tele fo’i na o lesi tupe su’e e fa’aaooga ai. 

E avea le faigata o le olaga ma lu’itau i le tina o Elaine ma o le mafua’aga lea o lo’o fa’amalosi ai pea. 

Samoa, a e fia fesoasoani ia Elaine ma lona aiga, pe e te silafia fo’i sesi e fia foa’i se fesoasoani, o le numera lea e maua ai o ia, 7204423.

By Aruna Lolani 30 March 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>