“Ua ta le-lavā tau’ave lenei pologa, le fa’atautala fai-fai-pea, ma ua ‘ou mana’o ai lava e fa’a’uma ma tu’u loa.”

O le tagi-talatala lea a se tina e 26 tausaga e to’atolu lana fanau, ma ua o’o fo’i lona mafaufau i le pule i lona soifua a’o tau-sa’ili fesoasoani atu i le To’omaga Mo E Puapuagatia. 

O ona manu’aga, ona loimata, o lagona ma va’aiga o lona tino, na momoli mai ai le tala’aga o sauaga ma mea le-lelei o lo’o la feagai. Ua tausagā o pologa pea ma feagai lea tina talavou ma mafatiaga, tula’i ai loa ma le lototele e tu’ua lea olaga o sauaga, ona o le fia soifua saogalemu, soifua fiafia ma filemu lona mafaufau e tausi lelei o lana fanau laiti. 

O le tagi-tu’i a se tina-sauaina fa’apea, e le o se mea fou aua e fa’alogoina lava e le To’omaga i aso uma. Moni la e fa’alogo iai i aso uma, ae matou te fetagisi fa’atasi ai ma nai tina nei, o nai fanau-teine fa’apea o matou uso.

O le mea ua matou matauina i nei sauaga i totonu o aiga, o le ogaoga o le lotoita, e le gata i e faia ia sauaga, a’o latou fo’i sa sauaina a ua fa’asaoina, fa’apea ai ma nai fanau, ua afaina fua ai. O sauaga nei i totonu o aiga, e mafai lava ona oti ai se tagata, ma ua matou matauina fo’i se suiga tele ia latou e a’afia i sauaga nei, ua o’o-o’o lava mafaufau i le pule i le ola. 

E avanoa tama’ita’i ma ali’i-faufautua a le To’omaga i le 24 itula i aso uma e fitu o le vaiaso atoa. E maua le fesoasoani i so’o se taimi e telefoni mai ai i le numera 800-7874 e leai se totogi.

“O le avea o a’u nei ma Peresetene o le To’omaga mo E Puapuagatia, pau lava lea matou te mo’omia, na o lou vala’au mai lava pe a mo’omia o se fesoasoani. Ona pau lava lea o le ‘auala e mafai ai ona matou fesoasoani atu ia te ‘Oe, mo le fa’asaoina o lou soifua,” o le fa’aaliga lea a Siliniu Lina Chang. 

O le matou galulue so’o-so’o-tau’au ai ma le Vaega mo Sauaga i Aiga a le Matagaluega o Leoleo, o le fa’amoemoe lava lea, ia mafai ona matou avatu vave le fesoasoani lea mo tina uma o lo’o sauaina ma faia iai uiga fa’atautala, i le taimi latou te mo’omia ai. O le talosagaina o se Poloa’iga mo Puipuiga, o le tasi lea o lea fesoasoani. E fa’afetaia fo’i le galulue fa’atasi ai ma Fa’amasino o le Fa’amasinoga mo Aiga, ona o le sao taua ma aoga ua ofoina mai e fo’ia ai ma taofia le faia pea o sauaga i totonu o aiga o Samoa. 

 “O le fa’asaoina o le soifua, o le fa’amuamua lava lea a le To’omaga, ma o la matou tatalo fo’i lea Samoa, ina ia tatou galulue fa’atasi e fa’asaoina so’o se soifua ne’i ma’umau, Fa’afetai, fa’afetai tele!” Siliniu Lina Chang, Peresetene o le To’omaga Mo E Puapuagatia.