O le tiute fa’atina e le mafai ona suia

Tusia Aruna Lolani ,

62 Hits

O le tina matua ia Fa’afili Afoa mai Matatufu.

O le tina matua ia Fa’afili Afoa mai Matatufu.

Na maua le fa’atalatalanoaga a le Fofoga o Samoa fa’atasi ma le tina ia Fa’afili Afoa mai Matatufu.

Sa ia ta’ua, o lona tiute fa’atina e le o se mea e alu alu uma, o se galuega e fai pea i aso uma, tusa lava pe matutua le fanau.

E 67 le matua o lona soifua ma sa maua lana ia faatalatalanoaga ao feagai o ia ma le vaaiga o le fanau iti a lana fanau.

“O lo’o sologa lelei pea mea uma,” o lana saunoaga lea.

“E leai a ni suiga tele , o le nofo a o le tagata i lona ia fale.”

Sa fa’apea mai Fa’afili e fua le faiga o ana galuega i lona malosi e maua i aso uma.

“A lava foi a le malosi, e tele foi na i feau e fai , a fai foi ua vaivai le malosi, ia ua nofonofo foi le fale ma vaai le toeaina ma si au fanau; le fanau a lau tama tama.

“O a’u ou te faatina a i lau fanau i taimi uma, e moi a e iai le fanau teine ua fai o latou aiga ma o latou fanau, ia ou te vaai atu a i isi taimi e lelei mai, ae a ou vaai atu a ua fa’aletonu mai, ia ua o’o ai foi le sasa.

“E moi a ua fai le fanau ae pau a lau galuega e tatau ona fai, o le faatonu ile mea e tatau ona fai.”

Sa ta’ua foi e Fa’afili le tele o suiga ua ia vaai ai i lenei vaitaimi.

“E taugofie oloa i aso ua tea, e mo’i a sa taugofie ae o aso la gei ua le toe gafatia.

“E lei pei o la aso o talavou tatou.

“A leai a le tupe e maua mai le penisione, aua o maua ma le toeaina ua tala le penisione, ia ma le tamaitai la lea e faigaluega, a maua a lona totogi e aumai a le tupe. 

“O se fautuaga i tina, ia fa’atonu le fanau ao talavou, lae lei oo le taimi e fai ai ni fanau, aua e o’o ifo lena taimi ua tele foi le suiga ua iai.”

© Samoa Observer 2016

Developed by Samoa Observer in Apia