Ma-o lea ua amata. O lea matou te talanoa atu e uiga i le taunuuga o le Faiga Palota Lautele, lea ua lauiloa poo e le o lauiloa tele e avea ma vaitaimi o talosaga tau faiga-palota.

Na amata ananafi e ala i le faamaonia o le tele o talosaga ia ua uma ona faaulu i le Faamasinoga Sili.

Ma e tusa ai ma le faamatalaga ua faailoa mai ia i matou e o’o mai i le taimi nei, atonu ua tatau i le Palemia o Tuilaepa Sailele Malielegaoi ona toe mafaufau i nisi o tofiga  i tulagā tofi autu i totonu o le Palemene ma le Kapeneta e tusa ai ma tuuaiga ia ua aliali mai.

O le mataupu muamua lava e faasino i le Fofoga Fetalai o le Palemene, o Leaupepe Tole’afoa Faafisi, lea ua tuua’ia i le fai o mea sese e se fili i le Itumalo o Aana Alofi Nu. 1-o Aiono Tile Gafa, lea e manio mai ua na matua tuua’ia le Fofoga Fetalai i faiga pi’opi’o tau faiga-palota i totonu o se talosaga lea ua na faaulu i le Faamasinoga.

Ua faapea foi ona tuua’ia le Ofisa o le Komesina o Faiga-Palota i totonu o lea talosaga i le faamasioga. Ua uma ona faamaonia e le Ofisa Sili o Pulega o le Matagaluega o Faamasinoga ma Pulega Tau Faamasinoga, o Papalii John Taimalelagi, tagi e faasaga i le Fofoga Fetalai-o se tasi lea o ni talosaga e ono tau palota ua uma ona faaulu i le Faamasinoga.  O isi talosaga e lima e aofia ai:

• Lafaitele Patrick Leiataualesa e faasaga ia Aliimalemalemanu Alofa Tuuau

• Ale Vena Ale e faasaga ia Lealailepule Rimoni Aiafi ma le Ofisa o le Komesina o Faiga Palota 

• Palusalue Fa’apo II e faasaga ia Leaana Ronnie Posini ma Manualesagalala Enokati Posala

• Anae Misa Pita e faasaga ia Taefu Lemi 

• Maualaivao Pat Ah him e faasaga ia Faumuina Wayne Fong

• E tusa ai ma Papalii, o le vaega tele o ia tagi na faaulu-o loo tuua’ia ai faiga pi’opi’o, faiga tau faasese ma faiga pi’opi’o e faasino i le soli o tulafono tau faiga-palota.

O ia talosaga uma ua uma ona tuuina atu i le Faamasino Sili, Lana Afioga Patu Tiava’asu’e Falefatu Sapolu mo se toe iloiloga a’o lumana’i ai le faatulagaina o se aso e fofogaina ai.

• I le taimi nei, na faamaonia e Papalii e faapea e tolu isi lava e faasino i moliaga tau solitulafono ia ua uma ona faaulu i le Faamasinoga, ia o le a fofogaina i le aso 12 o Aperila 2016.

O nei mataupu e aofia ai moliaga tau solitulafono e faasaga i ni Sui Usufono se to’alua o le Palemene ma se sui o tagata lautele: O ia Sui Usufono o le Palemene o 

• Sala Fata Pinati, o le Itumalo o  Gagaemauga Nu 1

• Pa’u Sefo Pa’u o Faasaleleaga Nu. 2

E le’i faamaonia e le Ofisa Sili o Pulega o le Matagaluega o Faamasinoga pe o a ia moliaga. Ae poo a lava ia moliaga, o le a faaalia lava i se taimi mulimuli ane ai. 

I le Lua vaiaso talu ai, sa matou fai atu o lenei taualumga tau faiga-palota e matua faigata lava. Sa matou fai atu e faapea o lea taualumaga o se tasi lea o a latou faamasinoga lea e sili ona talafeagai i ai le faaupuga ‘e le mafai lava ona uma se’ia vagana ai ua matua uma lava’-ma ua matua sili ona talafeagai i ai.

O le mea moni, o se taualumga lea e matua gatete ai uaua o le tino mo le ‘au-polokiki o lo latou lumana’i i totonu o le li’o tau polokiki- ua tautau i totonu o se fua a’o faaauau pea lea taualumaga.

E te le mana’o e te se’e i o latou se’evae. O le tulaga muamua-sa i ai lava le ala o faiga faatosina, ona soso’o ai lea ma le i ai o le vaitaimi e faitau ai pe o fea o i ai le ta’ita’iga i totonu o nisi o itumalo ia ua sui mai lea taimi i lea taimi. 

Ma o le taimi lava na mae’a ai ona faatauto i latou e avea ma Sui Usufono o le Palemene, ae o lea ua tula’i mai lenei tulaga ma e ono mafai ona tosotoso ai lava mo nisi masina o i luma, pe a tusa ai ma le silasila a le Faamasinoga.

O se mea agaleaga lea. Ae peitai- o le tulaga lava lea e i ai. O se taualumaga lea e ao ona mulimuli ai. Ina ia mafai la ona fai le amiotonu i Sui Usufono o le Palemene ia ua tuua’ia ma molia, e le na o i latou vaega ia e tatau ona latou uia lenei taualumaga.

O loo i ai isi ia atonu na faia nei fuafuaga e fofō ai a latou mataupu i fafo atu o le Faamasinoga. O se tulaga lelei lea.

O loo i ai foi se a’oga o le mafaufau o loo faanunumi le latou tilotilo i sui faatutu ia na faauluina nei talosaga poo tagi tau le faiga-palota, ia e fai mai e na o le maumau ai o le taimi. Matou te le auai ma le faaaloalo.

Afai o le amiotonu o le sini mulimuli lea, o lenei fuafuaga o se vaega atoa lea o le taualumaga ma matou te fai atu-ia tuu le amiotonu e faatino lana matafaioi. Faafogafoga mai pea!