Leai ni avanoa faigaluega i Savai’i

By Aruna Lolani 01 June 2017, 12:00AM

O le olaga i Samoa e faigata i nisi o manatu o tagata, aemaise lava le motu i Savai’i. 

O le manatu lea o le ali’i ia Sau Togafau o le nu’u o Iva i Savai’i. 

Sa ia taua le leai o ni avanoa faigaluega i Savai’i ma o le ala tonu foi le o lona o’o mai i Upolu.  

“O le olaga i Savai’i a leai lava se galuega o le ma'umaga lava lona tali,” o lana lea tala." 

“O le ma'umaga lava e fa’amoemoe i ai aiga i Savai’i, o le tele foi o aiga e fagota le gata'ifale aua se i'a mo mea’ai." 

“O matou a ia o le ma’umaga a le tali o lo’o iai i le taimi nei pea mana’omia se tupe mo saogatupe pe totogi fo’i mo ni mea e mana’omia, ma o se mafua’aga lena ua fia maua vave ai se galuega."

“O a’u sa ou galue fa’atasi ma isi tagata o le nu’u i le moaina o vao, ae sa fa’auma la’u galuega ina ua ou faimalaga atu i atunu’u i fafo."

“Mo le silafia fo'i, o le ala foi lea le na tumu le taulaga nei, o tagata mai Savai’i e saili galuega mai." 

“Aua o lo’o loa ona silafia le tatou atunu’u o Apia lava le taulaga e tele ai galuega, i pisinisi ma kapani." 

“O lea la e su’e galuega ma o la’u tatalo ia ou mauaina se galuega e fetaui ma lo’u tomai lea iai; ou te lelei i le moaina o le vao, o le fa’amama ma le teuteu fanua fa’apea fo’i le fai fa’ato’aga."

Sa ta’ua e Sau o ia sa le lelei i se aoga.

“Sa uma la’u a’oga ina ua ou iloa ou te lelei ai, ua ou fa’alogo ifo ua ou fia galue i se galuega e fetaui ma lo’u malosi."

“O lea la sa ou amata ai i le fai ma’umaga i si o matou aiga i Savai’i aua lava le tausiga o aiga." 

“E tele a le fia fai o so’u aiga mo le lumana’i ae e le mafai. Ou te mana’o a a’u ia e fesoasoani ma tau atia’e muamua lo’u aiga i le taimi lenei."

“Ma o le mafua’aga fo’i lena ou te talosagaina ai se galuega e fetaui mo a’u ina ia ou fesoasoani ai i lo’u aiga o lo’o tu’imailemulipapaga.”

O Sau Togafau e mana’omia lava se fesoasoani i le su’eina o sana galuega, a e fia fesoasoani pe e te silafia fo’i sesi o fia fesoasoani, e maua o ia i le numera 7269755.

By Aruna Lolani 01 June 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>