Ia malosi le loto

By Ioana Tupa'i 31 October 2017, 12:00AM

E ui i le vevela o le la ae le’I avea lea ma itu e faavaivai ai le taulealea ia Telea Viliamu ina ia mautinoa ia uma lelei ana samoasa ma ana keke pua’a ona faatau.

Na maua atu e le Fofoga o Samoa lea taulealea a’o toe agai atu ai o ia I lona aiga i Faleula I le maea ai o le faatauina o ana samosa ma keke pua’a.

E 27 tausaga le matua o lona soifua  ma o se taulealea matuai fiafia lava e faatino lana pisinisi laititi.

Telea Viliamu mai Faleula na nofo mai o ia mai lana galuega I le lua tausaga talu ai…

“ I le lua tausaga talu ai o lau pisinisi laititi lava sa fesoasoani malosi lava I le tausiga o lo matou aiga.

“ O le seleni e maua mai e faasoasoa lava lea I le tausiga o si au fanau e toalua ma le faatupeina o nisi o faalavelave faaleaiga ma faalavelave faale-ekalesia.

Sa fesiligia foi lea taulealea pe le toe fia saili se isi galuega peitai sa ia faailoa e leai se isi uiga e toe saili ai se isi ana galuega, o lea ua mautu lava lana pisinisi laititi lea o loo faatinoina I le taimi nei.

“ Faatusatusa atu lana tupe maua a’o faigaluega ai e $150-$170 I le vaiaso.

“Peitai I le taimi nei ua mafai ona ou u’uina I lou lima le seleni e $160 I le $300 ile aso mai le faatauina ai o au keke pua’a ma a’u samosa o loo gasese mai lava I le fale.

“E ui lava e le o se pisinisi tele ae o loo mafai lava ona tausia ai si ou aiga.

Ae o loo iai lava lona faanaunautaiga ina iai se taimi oi luma e ono faatele ai lana pisinisi ae mo le taimi nei o loo tau amata lava…

I le maitau a le susuga ia Telea I le toatele o tupulaga ua nonofo I aiga ona ua le mafai ona faaauauina a latou aoaoga e ao ona o latou finau e saili auala eseese e mafai ai ona fesoasoani I le tausiga o latou aiga.

“E ao ona faatino a latou pisinisi laiti ma saili fesoaoani mai faalapotopotoga eseese tumaoti poo le malo e maua ai seleni e fesoasoani e ono faavaeina ai a latou pisinisi laiti. 

By Ioana Tupa'i 31 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>