Manuia lau Malaga Iokapeta Petaia!

Tusia Ioana Tupa’i ,

98 Hits

O le Aso Faraile o le vaiaso nei na fa’atautaia ai toe sauniga o le tinā ia Iokapeta Fualuga Petaia i le malumalu a le Ekalesia Faapotopotoga Kerisiano Samoa i Vaivase-tai.

Sa faapea ona auai ai le afioga i le Palemia, Tuilaepa Lupesoliai Sailele Malielegaoi, Minisita o le Soifua Maloloina Tuitama Dr. Leao Talalelei Tuitama, Kapeneta, sui o Malo mai atunuu i fafo faapea sui mamalu o le Asosi o Tausi Soifua.

O ona toe sauniga sa taitaia e le susuga i le Faifeau ia Seilala Luamanuvae.

I le molimau a le afioga i le palemia sa ia talatala ai i le mitamita o lea tinā i le avea ai o ia o se tausi soifua resitaraina.

“O le tinā ia Iokapeta sa amanaiaina i le patipatia ai o le 100 tausaga o tausi soifua i Samoa nei,” Susuga Seilala Luamanuvae.

“E masani lava ona ou faalogoina faamatalaga o nei tausi soifua e lagonaina e le tagata o loo gasegase le mafanafana o aao o nei tausi soifua pe a faatinoina a latou galuega fesoasoani.”

“O Iokapeta o se tasi lea o toa manumanu sa fa’avaeina le asosi o tausi soifua.”

“O le galuega o loo faatinoina e tausi soifua e aofia ai ma galuega sa faatinoina e le tinā ia  Iokapeta e ese ma le taua. 

“Ma ou te talitonu o le a faigata ona faagaloina galuega lelei sa faatinoina e lenei tina.”

I le molimau a se tasi o alo tamaitai, Galumalemana Nuufou Petaia sa ia faapea ai o lona tinā o se tagata e loto alofa.

“O lo matou tinā e ese fo’i le malie o ona uiga fa’aalia i totonu o la matou mafutaga.

O Iokapeta na soifua mai ia Fepuari 29,1924. 

“O lona aso soifua e fa’atoa faamanatuina lava i le tai fā tausaga,”

“O le faiga lava la lea e faamanatu ai lona aso soifua ma e fai mai lava o ia e laititi ai lava i ona uso ma ona tuagane i la latou fanauga.

Sa toe tōmanatu Galumalemana i le galuega faale-tausi soifua a lona tinā, e ese ma le taua ma le faapelepele i lona agaga.

“O a matou fanau ma fanau o a matou fanau o loo matuai lagona le faanoanoa ma le mafatia aua foi a manaomia le fesoasoani ia latou meaaoga faatatau le aganuu fa’asamoa, o lo matou tinā lava e sulu iai mo se fesoasoani.”

O Iokapeta Fuāluga Petaia o le afafne faasino ia Suasua Setu ma Aigaletai.

E toatasi lona tuagane ma ona uso e toalima.

Na faaipoipo atu Iokapeta ia Memea Toafitu Petaia ma e to’aiva o la alo.

Sa a’otauina Iokapeta i le aoga fa’afaifeau i Manunu, Aoga a le Ekalesia Iesu Keriso o le Au Paia o Aso e Gata ai i Sauniatu Manunu, Aoga Tulagalua i Malifa, Aoga Fa’atausi Soifua i Motootua, faatoa faau’u mai ai ma lona tusi pasi i mataupu tau Samoa mai le Iunivesite Aoao i le Papaigalagala.

Sa galue o ia o se tausi soifua resitaraina i Samoa nei, Niue faapea ai ma Niu Sila lea sa galue ai o se tausi soifua faataitai.

Sa avea foi o ia ma tausi soifua i le Kolisi o Samoa ae i le tausaga 1962 i le tausaga sa ia vaaia ai le nofo tumau a le Kolisi o Samoa seia oo i le 1981 lea na malolo ai loa mai lana galuega.

Sa avea lava Iokapeta ma tausi soifua e ui ua malolo mai le faatinoina o ona tiute ma sa galue ai loa i le faleoloa o lona aiga ma fai le tautua i le aiga, nuu faapea ai ma le Ekalesia i Vaivase-tai.

Sa o ia i faailoga taualoa, tusigatala ma le 50 tausaga o pisikoa i Samoa nei.

Sa mauaina foi e ia le faailoga o le tausi soifua i le faamanatuina ai ai o le 50 tausaga o Tausi Soifua i Samoa nei.

© Samoa Observer 2016

Developed by Samoa Observer in Apia